入行多年的馬國明角色多演戇直青年為主，但在劇集《女拳》裏，終於可以有新嘗試，今次他演由忠變奸的游三水，期待之餘更寄望奸到被人鬧。雖然與梁嘉琪合作過後互相讚不絕口，但兩人堅稱不會戲假情真，馬國明坦言只會愛上角色而不會愛上對手。
馬國明和梁嘉琪日前在將軍澳電視廣播城宣傳現正播映的無綫劇集《女拳》，馬國明坦言很期待此劇，原來他飾演游三水一角，有別於過往飾演的戇直角色，他說：「今次係我第一次做奸角，劇情話佢受咗好多寃枉、委屈，所以先會走咗去另一邊，我好期待由忠慢慢變奸嘅感覺，變化都幾大。」
演技獲得認同
馬國明說：「不過拍嗰陣有啲位太暴力太血腥出唔到街，我都想睇吓究竟剪咗啲乜嘢，我梗係唔想剪太多，最好係原汁原味出街，但係有導演讚我做得幾好，所以我對奸嘅戲份都信心幾大，最好奸到出街俾人鬧，咁就算成功。」
馬國明又坦言如果今次奸得成功，不排除向奸出發，他說：「拍完呢部戲之後，自己跟住都有啲戲係亦正亦邪，所以如果反應好都希望可以向奸角發展，呢方面嘅發展空間都幾大，希望可以畀大家一個新感覺，其實馬國明都唔係咁蠢。」
照顧同劇演員
今次在劇中飾演馬國明太太的梁嘉琪，對他讚不絕口，梁嘉琪說：「我哋成個合作過程好輕鬆，馬明亦好照顧對手，又會幫我諗，又帶我入戲，其實一直好想有呢個機會同佢合作。」問到有否愛上馬國明？梁嘉琪笑說：「愛上佢？差啲o架！不過只係喺戲入邊。」在旁的馬國明則笑說：「咪即係我失敗，個個都差啲。」
採訪、攝影：何慧斯
