連續兩年冧莊無綫《勁歌》亞太區最受歡迎男歌星嘅林峯，喺今個月初推出首張國語專輯《第一次》，唔使兩星期新碟銷量仲唔錯，令首次出國語碟嘅林峯打咗支強心針，佢都好希望可以抽空到星、馬、台灣等地宣傳，答謝歌迷嘅支持。
遇靈異事嚇親
其實林峯籌備今次國語碟已經成年，早前佢仲去咗台北拍攝四隻新歌MV，搵咗小師妹陳嘉桓做女主角。陳嘉桓因為喺MV度同林峯太親熱，搞到俾林峯粉絲狂轟，不過睇佢哋拍MV嘅相又真係幾親密，兩個人外形又好合襯，唔怪得佢哋會傳出緋聞啦。
今次林峯難得有機會出trip到台灣工作，原本佢計劃品嚐當地美食，點知因為太忙搞到日日都要食便當，林峯話：「不過同製作認真嘅導演同團隊合作就非常值得，特別係睇到咁有質素嘅完成品，真係令我讚嘆。」
不過拍攝時發生咗一件靈異事，事緣佢哋有日到偏遠郊區拍攝，附近仲滿佈陵墓，成隊人準備插上電源做準備時竟然全程冇反應，最後上香後先順利完成拍攝，真係驚嚇。