日產電動車Leaf雖已正式在世界各地開售，但反應實在太好，全球近3萬架定單中，目前大概只交到1萬架，搞到日產要Cut單喊停。本以為隨住日本Oppama工廠投產，有望可大幅提升產量，可惜遇正大地震，到前天為止共1,300架喺港口準備運往美國嘅車、1,000架宮城客服庫存全部報銷，更已關閉包括橫濱總部在內嘅六間工廠及營運中心，對未來產量絕對係大打擊。問番香港代理合誠汽車，暫時仍未收到日產對輸入香港汽車有甚麼延遲報告，亦未通知暫停落單，如全新七人車Serena，以及政府、大機構訂落嗰200架Leaf，暫時亦如期付運。至於即將在港發售嘅2012全新戰神GT-R，將不設庫存，收到柯打先再訂車。
至於其他日系廠牌，豐田暫時已關閉三間工廠，首當其衝包括主力生產Yaris嘅宮城縣工廠；富士重工亦已關閉五間工廠；而Mazda、Suzuki同Honda等，暫未有進一步損害報告，對輸港汽車影響仍屬未知之數。
好事唔怕多講，儘管日產在日遭受嚴重打擊，但仍捐出3,000萬日圓（約280萬港元），作提供車輛、醫療及其他救災物品支援，絕對唔係各家自掃門前雪。