人工不見大升，通脹又持續，單靠政府的突然性慷慨，都不能解決眾人生活煩惱。咁點算？似乎最快捷徑是買股票，但都要你出豉油甚至全隻雞。不過隨着i系產品覆蓋版圖快速擴張，靠apps發達的賺錢路越走越闊，只要諗得出idea，不需驚世程式，亦可從中搵食。
記者︰吳美美
攝影︰陳陶鈞、譚盈傑、梁細權
賺錢法門，從來貴有貴做、細有細撈，訪問了間接或直接因apps生財的幾個規模不同的公司，歸納到的是這句話：「查實寫一個app出來並沒有難度，重點在於你有否idea。」從來要在IT界搵食，idea是佔據了高地。
大公司 由等客到湧客
要知道多些關於apps的事情，記者拍門行內翹楚Cherrypicks。自2000年成立，現時主力mobilemarketing，規模已是香港頭幾名。抬頭看見牆上有客戶apps標誌，有MTR有恒生有TDC，粒粒巨星佢都有份幫手扮靚。行政總裁Jason提到，現時品牌對apps的需要供不應求，「由過往要透過advertisingagency搵客，至現時每一個星期我們都會收到五個有關apps的查詢，部份更是大牌子，基本上一日有一間，可想而知不是每一間都能serve到，市場轉變真係好大。」由等客至不斷湧客，有數得計：由iPhone3至4，前後不過是兩年光景，難怪現時全港已出現超過100間專門寫apps的公司。但根據Jason手頭提供的美國GlobalMobileMarketingAssociation，於上年底發表對2011年MobileMarketing的趨勢預測（ http://mmaglobal.com/news/mobile-marketing-association-outlines-top-ten-mobile-marketing-trends-watch-2011-december-2010），apps的飽和年是2013，繼而回落；雖然不會消失，但這兩年絕對是apps的衝刺期。
有橋才會贏
記者聽完，都想個腦立時標出idea搵快錢，既然Jason在前，即時問問小本經營或freelancer應走哪條路最易賺錢，又合乎自身規模呢？「我會建議不要寫games，因為競爭太大。其實有個term叫gamnification，例如我們有個app是MTRMalls，將內裏的coupon變做魚，要捉上來才有；即是將一件無聊或傳統的事gamnify，變成有趣。所以我建議freelancer最好找日常生活的事情將之gamnify，就如『搵廁所』，個app本身可免費但可以賺廣告錢。我們亦不介意freelancer走上來sell橋的，可以一齊合作做都得。」
小公司 一個app賺一年錢
Apps餅仔依然大件，連帶做了15年雜誌的Tom都要踩過界，成立公司TsumoEntertainment，剛剛為CanonG12設計了iPad版app。「我收到連中藥、保健品牌都話要寫apps，可想而知普及程度；再想想中國，潛力可以好大。」一來就放眼擁有13億人口的中國，眼界果然闊，所以連帶他的提議都滲有中國傳統，「我覺得運程、風水、通勝等，AppStore都有好多，但未做得夠好，若idea不足，不妨向實用性方面諗，我覺得會較好。」單是迷風水已有大把人。
現時寫apps市價約8萬至16萬元不等，單憑寫apps夠撐起公司嗎？「絕對足夠營運，只要你有規律、肯諗idea。例如好多美國專寫programme的人都無正職，但本身有技術，可能佢用三、四個月去製作一個app，但已經維持到佢一年的生活。」來來去去都是那一句：Ideaiseverything!
個人版 上了架就等收錢
本身從事multimedia工作的阿輝，現時與朋友夾份開的公司中，他是集中火力寫apps的一位。由iPhone3G學寫至3GS時期開始出apps，上架的不上架的為數不少，收費$8,000起錶，相比寫網站最低收費$15,000，平足大半。「對客戶而言，有app似是幫公司跟得上潮流，但我就覺得是宣傳渠道的必需品。就算是一個全職工作的人想寫apps都絕對可以，我之前寫apps都是每日花兩三個鐘develop，當然比起現在時間要更長。」相信大部份讀者最想知的，是單單設計apps可否當飯食？或者有份可觀的bonus？「其實我有隻影相app賣緊US$0.99，銷量中規中矩，平均每月賺$2,000。好處是你已經放上架，只要你定時keepupdate，下載命中率又會提高。」聽到未？秘訣要不斷製作updateversion，保持新仔形象，就自然多人下載，錢就自動入袋。
4As嫌apps收入少
客戶對apps的需索不斷增加，傳統的4As廣告公司會否加入市場搶餅仔？Grey創作總監Keith就表示現時公司都未有計劃成立一個部門專門製作apps，只當它作電視或平面廣告般平等對待；而且它的收入相對傳統廣告收入少，至目前為止都只是做咗三四個apps。不過Keith就提出一點，說現時要請一個寫app的程式員好難，難在無人肯打工只肯做freelancer，又或者自行到iTunesStore登記後就自己任寫apps唔嬲。嗱，邊位後生仔話搵工難先，好明顯有多份相關職位等緊你哋啦！
