日本發生九級大地震，帶動史上最強海嘯衝擊仙台，宮城縣一帶海岸，災情慘烈，令人目不忍睹。日本NHK百分之一百專業，下午一時四十五分發生地震，二時半左丁山回到公司，now已經有NHK直播海嘯現場，左丁山睇到目定口呆，尤其是海嘯飛撲陸地，山上汽車走避不及，給海水吞噬一幕，緊張過睇災難電影千百倍，日本科技水平當然係一流，但估唔到嘅係日本好似隨地都有攝錄機，短短時間內可以將311之大災情呈現於全世界觀眾眼前。
隔岸觀災，似乎冇乜感覺，但好多朋友都去過仙台旅遊景點，對當地有印象，見之無不驚呼，女士掩口呀呀呀。肥仔K在日本讀書時與同學揸車遊仙台數日。對當地有感情，而且一位日本同學取得博士學位後就應聘到仙台大學任教，睇電視為之心急如焚，急忙用手機、電郵、SMS、fb等工具與同學聯絡，至今天不得要領，同學生死未卜，為之黯然，幸好在東京大阪之朋友同學紛紛在fb露面報平安，有驚無險，叫做安樂一啲。
日本人嘅公民教育好，長幼有序，發生咁大件災難，廣泛地區在寒冷天氣中停電、缺水缺糧缺禦寒衣物，社會仍然秩序井然，不見有破壞搶劫奪糧之事，呢個民族實在可畏可敬，係世界模範。我話日本有小小缺點，就係過份自信，婉拒美國幫忙挽救福島核電站，卒之拖延失誤，釀成爆炸及輻射洩漏，有專家話此乃追求完美主義之錯失，良可嘆也。
在千里之外，在電視見到如此慘事，心有惻惻然，世事無常，莫過於此，仙台乃係人間美景，昇平之際，那會諗到瞬息間，千年一遇之海嘯來襲，大難臨頭，家破人亡吖。人定勝天喎，千祈唔好相信甚麼抵禦海嘯嘅防坡堤，深64米長2公里，造價15億美元，建於Kamaishi（岩手縣）港外，大水到，似豆腐渣咁硬啫。造物弄人，要信天命至真，人生在世，「寄浮游於天地，渺蒼海之一粟，哀吾生之須臾，羨長江之無窮」蘇子如是云。巨浪湧至，欲避無從，岸上之龐然巨物，竟如一葉扁舟，大自然震怒也，「水擊三千里」，人類何其渺小！為六千元派錢而鬧得沸沸揚揚，益顯其地之淺薄。