人生無常，日本東北沿岸美麗小鎮，一下子可以毀於一旦；而健健康康嘅職業足球員，卻又突然發現可能患癌，隨時連球員生涯都要結束，講緊嘅不幸兩個主角，係巴塞隆拿嘅法國後衞艾比度同前曼聯球星、泰國教練笠臣（細笠）。
剛在泰國完成手術
曼聯官網周三公佈，前隊長笠臣3月3日喺曼谷一醫院完成喉癌手術，主診醫生表示情況樂觀，相信可以完全康復。不過笠臣仍要接受治療，為咗保持私隱，所以都冇詳細透露情況。54歲嘅笠臣手術成功，相信都可以畀即將做手術嘅艾比度多啲信心；不過笠臣家喉嚨有事，我求大俠就奉勸佢教波時唔好大聲叫嘞！
巴塞艾比度肝有腫瘤
另外，巴塞隆拿官方網頁周二就公佈一個令人傷心嘅消息，後衞艾比度被驗出肝臟有腫瘤，球隊立即安排專科醫生奧比根（JosepFusterObregon），下周四為佢進行手術。而巴塞表示為咗保障球員私隱，未有透露更多消息，好似腫瘤屬良性定惡性，與及嚴重程度等一概唔知，不過始終肝臟喺一個非常重要嘅器官，艾比度接受完呢個大手術後，短期之內相信難以復出球場。
事件一出，不分敵我，都齊聲透過twitter鼓勵艾比度；巴塞隊長佩奧爾贈言：「加油，艾比度！我哋與你在一起，你好堅強，你一定能度過呢一關。」另一巴塞後衞碧基表示：「向你獻出全世界嘅關懷。」基斯坦奴朗拿度則留言：「我希望艾比度身體沒有問題，很快可重返球場。」
其實之前不時傳出職業運動員患癌嘅不幸消息，當中都有成功例子，好似美國單車好手岩士唐，96年發現患上睾丸癌，更擴散至肺部同腦部，不過佢都完成艱苦嘅化療，99年至05年連贏6屆環法單車冠軍添。另外，西班牙老牌門將摩連拿，02年當時效力拉科魯尼亞時發現同樣患上睾丸癌，佢一樣成功克服癌症，03年復出，家更轉到維拉利爾C隊當教練。有咁多好例子支持，我求大俠都希望31歲嘅艾比度，同樣可以戰勝病魔復出。