錯就要認，打就企定！
雷諾汽車（Renault）喺1月以洩漏公司電動車機密呢條罪，怒炒3個員工，點知經過兩個幾月之後，發現炒錯人，原來當初告密嘅人先至係真正罪人！所有角色即時嚟個大兜亂，搞到行政總裁戈辛好尷尬，惟有即時補鑊，除咗公開向3名食死貓員工道歉兼賠償之外，佢自己同成班管理層，仲一齊放棄舊年嘅花紅同今年嘅股票期權，以示賠罪。
件事係咁嘅，雷諾兩個月前聲稱握有證據，將3個涉嫌向中國洩漏電動車機密技術嘅員工豉椒炒魷，到上個禮拜先發現原來「賊喊捉賊」，戈辛話，佢同營運總監佩拉塔，向受害員工同佢哋嘅家人送上最深切嘅慰問，亦會盡快同佢哋面對面傾賠償，仲希望可以重新聘用佢哋……成件事好似好兒戲咁喎！