一位朋友在中大讀書時，係著名靚女，讀完英文系就到英國深造，某年在街上偶遇，當然認得佢啦。立即捉住佢講番幾句，問佢做邊行，係唔係教書呀？靚女C嫣然一笑：「做speechtherapist。」左丁山學識少，都唔知佢講乜，佢解釋一番，先知道「語言治療師」是甚麼一回事，現在有電影叫做「皇上無話兒」，左丁山又係不明所以，不知道何為「無話兒」，要睇陶傑、李純恩解釋先至明白。
呢日見到一班家長、教師、校長，討論教學問題，知道最令家長、教師、校長最頭痛嘅教學問題來自特殊學生嘅特殊需要，例如一位學生有天生心臟毛病，上樓梯會心跳加劇，不能走動。學校大樓有幾十年歷史，B座有殘舊電梯，呢位學生可以藉此上落課室，但實驗室在A座樓上，A座無電梯，學生上唔到去，如何是好？向教育局申請撥款為A座興建電梯，都要幾多錢嘅噃，申請需時，短期內難有希望。又例如一位家長講女兒讀會計拿一百分，英文及格，但中文好唔掂，天生閱讀困難症，要求特別輔導；又有一啲學生說話，如喬治六世，講極都唔清楚，需要語言治療師輔導，但最多嘅係患上過度活躍症，經常撩交打，打架完畢就知道向老師認錯，好需要特別輔導。幾類學生加埋有三十幾人，佔學校學生比例唔大，但消耗極多教師時間，教師又唔係專家，故此教師與校長為之費神頭痛。如果少啲理會呢類學生，除心有不忍之外，更恐怕有人向林煥光投訴。
左丁山醒起預算案第156段有講：「我們亦會擴大專業團隊，預計每年為額外約3,000名患有自閉症和過度活躍症的兒童提供服務。」於是叫校長向政府申請援助。但據佢講：「好難嘅，好難嘅！」似有難言之隱。政府肯幫忙都唔制？次日，特登問吓退休校長K，知唔知道有呢啲事情。校長K話：「略知一二啦，教育局有一個習慣，就係每間學校申請兼得到特殊學生津貼支援之後，就不斷將呢類特殊學生派到申請成功嘅學校，搞到校長怕怕。唔敢向教育局申請支援。但亦有一啲學校因而收生不足，毅然申請，得咗之後，教育局派嚟嘅特殊學生夠晒多，啱啱可以避免殺校，救校成功！」