阿仙奴嘅門將荒可望解決，不過，咁反而可能引發另一個龍門危機？係唔係畀我求大俠講到一頭霧水？我咁講係因為阿仙奴領隊雲格打算叫前門將列文出山解決門將荒，不過由於列文同現時兵工廠唯一「健在」嘅門將艾蒙尼亞一向唔妥，所以佢今次回巢究竟可唔可以幫球隊後上奪得英超，真係要放長雙眼睇吓。
與艾蒙尼亞恩仇未了
現年41歲嘅列文，係阿仙奴喺03/04球季全季不敗奪得英超嘅功臣，比賽經驗好豐富，而且佢有德國人嘅特性，就係心理質素高；呢樣正好幫兵工廠目前呢班郁啲就騰雞嘅後生仔，雲格搵佢幫手都算明智。不過列文歸隊後，雲格首先要做嘅，相信係化解列文同艾蒙尼亞嘅恩怨。
話說喺07年時，列文就係不滿艾蒙尼亞取代咗自己喺兵工廠嘅正選位，最後喺08年離隊投史特加。當時列文對艾蒙尼亞毫無留情咁抨擊：「我簡直覺得被侮辱，艾蒙尼亞根本未證明過自己可以帶領球隊取得勝利，我就有經驗得多。」
列文：樂意做副手
當時列文仲話：「要做一個30歲先至有正選打嘅人嘅副手，一啲都唔好受，我十分之憤怒。」而艾蒙尼亞最後亦忍無可忍反擊：「我一向待人以誠，但原來有人竟然咁憎我，真係好奇怪！不過我唔理咁多，我好樂意同法比安斯基及文路尼合作，因為佢哋比起某人好得多。」
就同艾蒙尼亞嘅恩怨，列文日前就強調往事已矣：「此一時，彼一時，家我已準備好迎戰呢個新挑戰，我好樂意做艾蒙尼亞或者係任何人副手，我認識呢隊阿仙奴，我知道我哋可以順利勝出今屆聯賽錦標。」據報，喺阿仙奴周六訪西布朗時，列文仲會被列入大軍名單，睇吓到時佢有冇同艾蒙尼亞面左左？但係好彩早前話提早收「咧」嘅後衞佐羅，原來傷勢唔係咁嚴重，據報可以喺月底復出。