「跳水皇后」郭晶晶有新動向……各位八卦友冷靜啲，唔係晶晶嫁霍公子，而係佢幫安踏（2020）做代言人啫！
安踏噚日宣佈推出「綻放心節拍」為主題嘅女子運動系列，搵咗晶晶、網球好手鄭潔同歌手張靚穎，齊齊做佢哋嘅形象代言人，希望鼓勵更多女性參加體育活動，宣揚安踏「釋放內在能量、綻放精采自我」嘅全新女子運動理念云云。
退役手續仲未辦完
釋唔釋放到咩女子運動理念就未知，但首先釋放到嘅，係晶晶鮮為人知嘅cute爆一面！唔信大家睇睇，呢個幼稚園老師體操堂動作，仲cute過隔籬嗰隻假熊貓，如無意外，以前應該只得霍公子一個人見過！
咁今次係咪晶晶趁「收山後等嫁中」呢個期間，搵番啲私己錢呢？嗯……內地班行家話，今年1月22日，國家跳水隊公佈晶晶已經申請退役，冇幾耐，河北省體育局都話收到晶晶嘅退役通知，但係需要搞掂晒啲手續先算正式退役o架。
之不過，佢哋噚日去過河北省游跳中心了解，原來晶晶嘅退役手續仲未辦完，即係佢家仲係現役跳水隊隊員，咁，咪即係有排都仲未嫁得？
話時話，安踏咁多年嚟都搵過唔少「星級」代言人，又運動員又歌星咁，但華華最有印象都係國寶級籃球明星姚明，其他嘅真係冇乜印象！所以你賣嗰樣就整番嗰樣，sell運動衫，就梗係搵運動員喇！bytheway，你啲嘢係掂嘅話，就千祈咪亂使錢搵咁鬼多代言人呀！
李華華
mailto:[email protected]