鄭秀文（Sammi）同許志安秘密復合，早前靜雞雞去太平館撐枱腳，點知俾本報撞破，事後兩個都大方承認戀情。被踢爆後Sammi馬上要飛去內地香格里拉拍杜琪峯嘅新戲《高海拔之戀II》，但佢忍唔住喜悅之情透過微博發表「太平宣言」，睇到都知佢同安仔甜到漏。
手稿表達內心世界
啱啱先同安仔復合就要分隔兩地，唔怪得Sammi拍拍吓戲，一有時間就返香港會情郎，噚日大約傍晚6點幾，Sammi由助手陪同出閘，雖然佢素顏兼戴黑超，不過一樣神采飛揚，仲唔覺意露咗小肚腩，唔知係咪食鹹牛脷太多呢？問佢係咪趁白色情人節返嚟同安仔拍拖？佢冇回答，至於被周刊搵到佢份「太平宣言」嘅手稿，仲有話佢刪咗肉麻情話，Sammi話：「我都係啱啱知。」安仔話唔會再畀Sammi離開自己，佢聽到即雙手合十表示：「我唔想再講，要講喺微博已講咗。我想講同手稿嘅內容大致相同，我諗缺德嘅唔係我，嗰篇只係表達自己內心世界嘅一封信，呢啲係私人嘅事。」
會唔會追究？Sammi話：「唔會，係我掉得衰，唔好好處理，但錯不在我，係由垃圾桶摷我份私人信件出嚟嘅傳媒。」轉個話題，會唔會送禮物畀安仔？Sammi話希望大家畀多啲空間佢，跟住就急步離開去尖沙嘴整頭髮。Sammi呢個禮拜尾要去大馬做演唱會，所以返嚟香港綵排，月尾先再返香格里拉會合古天樂同高圓圓繼續拍攝。