容祖兒和何韻詩早前被fans在網上踢爆齊齊放大假到日本和歐洲旅行，甚至傳兩人在荷蘭同度情人節。昨日阿詩復工表現風騷，提到和祖兒旅行她未有否認，但坦言被人踢爆感到掃興，不過阿詩強調行事光明，故未有被嚇怕。
一向熱衷玩微博的容祖兒和何韻詩這對好朋友情侶，近月來幾乎在網上失蹤，結果早前有fans踢爆原來兩人放大假，結伴到日本及歐洲如倫敦等地旅行，更有傳她們在荷蘭共度情人節，祖兒於情人節當日在微博上貼上一張鬱金香的相片，並祝所有人情人節快樂。被人踢爆和密友旅行，一向愛玩微博的阿詩卻發老脾，戲言不會再玩。
避玩微博保私隱
昨日阿詩和at17的Ellen及台灣歌手方炯鑌，到土瓜灣為「MusicWorld新城20唱好第一擊」音樂會綵排，充電回來的阿詩心情靚絕，問到是否和祖兒放假旅行？她一副古靈精怪說：「有啲咁嘅事咩？大約玩咗一個月，都係入行以嚟最長嘅一個假期，其實都開咗工個幾兩個星期。」阿詩透露今年是她加入樂壇10周年，是否因此要和祖兒旅行慶祝？她九唔搭八說：「呢度啲光管好光喎。」她又聲稱並非單單兩人旅行，還有黃偉文同行。
至於情人節是否在荷蘭度過？阿詩則否認說：「冇啲咁嘅事，冇去荷蘭。」問她當日在何處，她說：「咪喺你（指記者）心入面，喺你屋企入面。」是否因被fans踢爆而不再玩微博？阿詩直言：「我唔鍾意，搞到冇晒私隱，家真係好大壓力，好似周圍都有狗仔隊，人心惶惶，真係遲啲要去北極同婆羅乃。」
「想有啲空間啫」
阿詩認為fans八卦藝人私生活也要適可而止，問到是否不敢再和祖兒去旅行？她卻說：「咁又唔會，冇嘢唔見得光，只係想有啲空間啫，唔通我有做錯咩？」同場的方炯鑌對於好友戴佩妮早前被男性好友盜取提款卡偷錢，他表示認識兩人，希望大家給機會男方改過。
採訪、攝影：張俊銘
