馮仁昭四圍超：
孖福祿壽做百變偵探　阿姐化身阿婆查案 - 馮仁昭

汪明荃（阿姐）、王祖藍、阮兆祥同李思捷主演嘅《荃加福祿壽探案》本來大前日開工大吉，但阿姐大前日喺微博透露，話佢凌晨5點半已經返咗無綫化妝，點知祥仔病咗，令到外景取消，佢惟有喺canteen食完早餐後返屋企繼續瞓覺。

兩日四個Look

到咗前日，《福祿壽》終於齊人開工，佢哋一早去咗油麻地警署拍外景，劇中阿姐開咗間偵探社，王祖藍、李思捷同阮兆祥就幫阿姐打工，所以四個人經常要扮鬼扮馬查案，而阿姐開工兩日已經扮女神、村姑、迷人pinklady同老太婆四個造型，真係轉妝都轉到儍。
前日同噚日阿姐都有將拍外景嘅相放上微博，大前日佢同梁靖琪（Toby）扮完女神之後再扮村姑。而噚日阿姐就扮迷人pinklady同老太婆去永利街開工，阿姐好興奮咁挨住永利街個路牌影相，仲話：「《歲月神偷》都喺呢度攞景o架！」
不過，馮仁昭覺得最特別都係阿姐個老太婆look，家63歲嘅阿姐揸住枴杖扮個80幾歲嘅老太婆，佢除咗彎腰扮寒背之外，仲「木」埋個嘴十足冇牙婆，阿姐真係好鬼投入。