南華班主是誰？相信無人不知是bma老闆羅傑承。但羅老闆最愛係乜？可能好多人只識答足球同賽馬，原來同樣講求速度的車都是他的至愛。首次接受車版訪問談車經，不單止對名牌超跑逐架評，仲自爆成日開快車，搞到扣剩兩分。但一提到跑車，羅生手舞足蹈的興奮程度，已叫我知道他愛開快車的心依然不死。
記者：許維雅
攝影：楊錦文
愛飆林寶 SClass傍身
本周末有兩匹馬出戰Mercedes-Benz香港打吡大賽的羅傑承，應邀出來談談馬說說車。傳媒鮮有報道他關於玩車的嗜好，原來他愛車的程度不比IT沈老闆遜色，Benz大部份AMG車系已經在他眼中玩厭了，家要玩林寶、拉利，甚至最新款的波子四門Panamera都有，「拉利揸得太快時會有啲飄；波子Panamera就太重，加速唔夠快；林寶入彎就真係可以入得好靚，我揸過咁多部跑車，最正係佢！」
點愛跑車都好，作為老闆一定會有部老細車傍身，訪問當日就坐了一部平治SClass過來，「我每兩年就會換一部SClass，呢部S500LCGI係新o架！慳油啲？我好少理啲油價幾多錢……」講唔夠兩句，羅生已經俾同場另一傳媒借來的SLS吸引住，仲衝埋上車試揸兩個圈，「嘩！都幾好力喎！雖然車身有啲重，但操控都幾好，反應好快。我好鍾意揸快車，成日趁朝早無車就會入機場兜圈。我已經俾人扣咗13分，好牙煙o架喇！」得番兩分，咪要上強制駕駛課程？「上咗啦！去油麻地上堂，已經攞番3分！」羅生的坦白、健談，實在係我意料之外，那份率直的風趣跟他平日斯文形象帶來截然不同的感覺。
玩車趁後生
對速度如此着迷，羅生直言是天生的，不論賽馬還是鬥車，細至小學四五年級已經有癮，人哋睇卡通，佢睇賽馬貼冠軍，亦試過喺澳門讀書時揸大膽電單車撻到成身傷。人生第一架車係豐田Celica，跟住就係日產Fairlady，直至入銀行工作先擁有第一架平治190E。家揀跑車會睇款睇速度，最緊張係0至100km/h要夠快，「啲車加速唔夠勁，好瘀嘛！有時出隧道口大家都急，你一加速就一下過咗人部車，嘻嘻！會好開心。」
不停換車、視車如寶的他覺得養車如養狗，「好大劑！你要好似放狗咁定時郁吓架車，但自己又忙，亦好憎借車畀人揸，逼住抽時間出去兜個圈入油。」話雖如此，他亦希望有生之年揸盡靚跑車，唔想老咗先恨，「家揸林寶一個鐘已經腰骨痛，我又唔想好似其他富豪咁，去到7、80歲都仲揸架拉利林寶出街，不過就係個司機揸，自己坐隔籬，咁就好怪，哈哈！」視車為一種玩樂一種享受，視馬有一半係當作投資，「香港馬會獎金高，回報率大，所以我都係捨得買馬多過買車。」真的嗎？羅生做完訪問臨上車前都突然回頭拋下一句，「記住搵人Send份SLS嘅Catalog畀我呀！」
羅老闆心水愛驅
S500LCGIEDITION125
引擎：4,663ccV8Bi-Turbo
馬力：435ps/5,250rpm
扭力：71.4kgm/1,800至3,500rpm
傳動：7G-TRONIC自動波後驅
售價：$1,858,000
查詢：28957339（仁孚行）
第134屆Mercedes-Benz香港打吡大賽將於下個星期日舉行，羅傑承今年會有兩隻馬參賽，分別係「軍事策略」及「軍事行動」，問佢想邊隻贏？「我想?一二名，哈哈，嘩，獎金有成千萬就和味喇！」
