關於小人國嘅故事，小時候都聽過唔少，而去年上畫嘅最新版《小人國大歷險》，更加入3D效果，成班「人仔」層次感豐富到痹！Blu-ray版今個禮拜終於到港，雖然無咗3D，但1080p全高清畫質相當細膩，特別留意埋當小人國士兵想試玩iPhone嗰陣，CG效果簡直逼真到暈，買番屋企睇無妨，但諗住當天碟咁測試，要諗清楚喇！
記者：陳國輝
玩完3GS再打IronMan
唔少人都入戲院睇過，劇情啱唔啱Feel見仁見智啦！但講到笑料，佢都算交足貨，最過癮係呢套片加入近期熱爆嘅「角色」，例如蘋果聖物iPhone，當小人國士兵第一眼睇見佢嗰陣，就好似發現新大陸咁，不過因為佢手掌細，未能解開鍵盤鎖；另外，故事尾段仲出現玩具界勁Hit嘅IronMan，故事中佢由好人變壞蛋，高潮位更同「巨人」JackBlack一決高下，究竟邊個獲勝？就等你買隻返去睇喇！
引發巨浪聲效 最震撼
呢隻碟大部份用CG製作，靚與唔靚，係講電腦合成技術啫！當然，無論佈景、物件，甚至天氣效果都可以自製出嚟，難度幾乎係零；而巨人結合小人國呢種畫面，如果合成技術做得唔似，就非常大鑊。整體感覺只係麻麻，特別光暗位處理，與環境未能配合；海上大戰一幕仲假，JackBlack走過之處突然變到海嘯咁款，你估佢係哥斯拉咩！反而要讚，係低頻音色表現唔錯，十足大戰氣氛。
Bonus內容頗多，但都係嗰幾招，有啲悶！最大問題係特別收錄只提供英語對白，無中文字幕，仲唔考起！好彩，入面有一款足球機MiniGame，可測試吓自己反應，幾得意。
Profile
格式：Blu-ray
畫面：1080p
音效：英語DTSHDMA5.1
特別收錄：蝦碌片段、刪剪片段、格列佛足球機大挑戰、《作戰之歌》舞蹈、積伯克專訪、世界各地首映花絮
