近年內地有「我爸是李剛」咁嘅富二代，令到一眾富二代變成過街老鼠，人人喊打。難得中國女首富、玖龍紙業（2689）主席張茵（圖），喺「兩會」期間出嚟為富二代講句好話，叫大家唔好歧視富二代。
年輕人剛投身社會壓力大
話說政協委員張茵開完兩會之後，一大班記者係咁問佢關於富豪榜嘅問題，佢苦笑住叫大家多啲關心民生問題，咪一味問佢關於「富」字。不過記者問多兩問，佢就話見到有啲富二代都好努力，仲話其實呢班年輕人剛啱投身社會，身受各種壓力，希望大家正視佢哋，唔好成日富二代、富二代咁叫佢哋。
講番兩會，張茵帶咗兩份提案，一份係關於打擊拐賣兒童犯罪嘅，另一份就希望對中老年人更加關注，等佢哋嘅價值可以更強咁體現出嚟。係嘅，如果商人可以多啲關心社會，可以令呢個世界更加和諧。