「十億大導」馮小剛拍戲有幾叻，大家有目共睹，但係估唔到原來佢「骨水」都有番兩道！華誼兄弟新鮮出爐嘅2010年度年報顯示，喺舊年11月1日禁售期一過，馮大導、馬雲、江南春等8個名人股東，紛紛沽貨套現，保守估計，8個人喺兩個月內一共沽咗2449.5萬股。
以舊年11月到年底華誼嘅平均價31.48蚊人仔計，即係以上8人cashout咗7.7億人仔！
根據資料，除咗阿里巴巴（1688）嘅爸爸馬雲因為要「改善生活」而套現之外，華誼嘅中流砥柱、大導演馮小剛，都抵受唔住套現嘅誘惑，原本有576萬股嘅佢，喺禁售期之後，即刻唔再名列十大流通股東榜，同第十位馬雲嘅391.2萬股持股量比較，馮大導即係減持咗超過184.8萬股。
馮大導跌出十大股東榜
以華誼近半年最低價25.01蚊人仔計，馮大導至少「骨水」4622萬人仔……可能呢個數字對佢兩位嚟講係濕濕碎，但係喺華華眼中，呢個「骨水馮馬配」，直頭係「阿里巴巴與一個大盜（導）」！
咁係咪全部名人股東都咁急不及待套現呢？又好似唔係，皆因排第一同第八嘅大股東魯偉鼎同導演張紀中，一個持有1180.8萬股，另一個持有432萬股，兩人一股都無賣出！
魯偉鼎張紀中一股都無賣
對一般股票嚟講，有大股東「骨水」跳船，對間公司係利淡消息，但係華誼呢個case，就好難講……娛樂圈啲嘢，向來都比較複雜！
李華華
mailto:[email protected]