人人都話中國假貨多，就連美國貿易代表辦公室喺今個月初，發表嘅一份指摘侵權或冒牌貨嘅「惡名市場」名單，中國喺名單上佔嘅位置都最多。但噚日商務部回應呢個「榮譽」時，質疑名單嘅合理性，仲堅持中國知識產權嘅改善係「舉世公認」㖭！
呢份「惡名市場」名單，包括全球30個實體同網絡市場，當中百度、淘寶、深圳羅湖，甚至香港女人街都榜上有名，而中國更佔咗最大部份嘅8個。不過，商務部條法司司長李成鋼噚日就力撐，話名單對企業商業信譽有負面影響，佢哋好關注咁話，仲質疑報告無實證，又唔代表美國政府嘅分析同評估，更加唔係違法行為嘅調查結果，講到份名單係唔適合公佈咁㖭！