陳慧琳（Kelly）今年初宣佈人工受孕懷孖胎，喜悅心情打孖上，上月底再宣佈今年7月便生孖女，但上周孖B卻不幸胎死腹中。痛失孖女令Kelly經歷女人最痛，不過堅強的她明白生兒育女講緣份，所以日後調理好身子，還是會再接再厲追女，但Kelly卻不會考慮再進行人工受孕，只會選擇順其自然。
樂壇天后陳慧琳出道至今，事業家庭都一帆風順，今年初她還開心宣佈即將生兔寶寶，她坦言是經醫生人工受孕致懷孖胎，上月底再報喜，表示懷孖女可以達成生女心願，可惜已懷孕五個多月的Kelly上周出現作動迹象，遂入院檢查，可是腹中塊肉還是保不住，孖女夭折要流產。痛失兩女的Kelly日前已收拾心情回家靜養，希望待調理好身子再圓生女夢，不過卻不敢再接受人工受孕，只會順其自然。
蝦餃仔精乖陪媽咪
38歲的Kelly前年一索得男，1歲多的囝囝劉昇（蝦餃仔）日漸長大，Kelly和老公劉建浩（Alex）去年計劃生女，始終Kelly也算高齡產婦，她早前獲悉懷孖女時非常興奮，打算生完孖女，三個夠晒數，肚皮也可於40歲前收工。
可是天意弄人，懷五個多月身孕的Kelly一周前感到不適，家人立刻把她送往瑪麗醫院檢查，經過連日來醫生的努力搶救，胎兒還是不保，據悉醫生要求Kelly把已沒心跳的胎兒順產出來後，看到未足月的孖女已沒有生命，她和家人都感到很傷心，幸Alex和蝦餃仔一直陪伴在身邊支持，Kelly這兩天心情已慢慢平復下來。
醫生表示Kelly小產沒有特別原因，只是陀孖胎風險加倍，經歷這個打擊，令Kelly不敢再接受人工受孕，寧願順其自然，生兒育女真的不能強求，她相信如果上天肯再賜多一個孩子給她，自有安排。Kelly的閨中好友昨日表示：「發生呢種唔好彩嘅事，Kelly同家人當然受到打擊，但佢都好堅強，仲識安慰自己，話上天已對佢好好，因為家已經擁有一個好老公同一個好得意嘅蝦餃仔，覺得自己好幸運。」
記者昨日欲向正在家休養的Kelly求證是否不再考慮人工受孕時，她的助手Leo回應說：「家唔會咁快諗再生嘅問題住啦！佢呢兩日心情好平靜，老公同個仔日日陪住佢，一家人仲有留意日本地震新聞，見災害咁大，Kelly都唔係咁開心，希望事件可盡快搞番好。」
家輝鼓勵Kelly再生
曾在電影《大事件》中與Kelly合作過的張家輝，他的太太關詠荷於04至05年間也曾兩度經歷小產之痛，最後夫妻同心面對打擊，直至06年，關詠荷順利誕下精靈女兒。張家輝非常明白Kelly此刻心情，並寄語她要振作，他昨日在電話中說：「發生呢啲事，做父母嘅一定會好難受，但我之前就咁樣安慰自己，上天要攞走個BB，可能有佢嘅原因，唔應該去勉強，Kelly仲年輕，可以再嚟嘅！」
已有一女的張家輝也想再追個仔，問到他會否採取人工受孕，他說：「老婆喜歡順其自然，所以唔會考慮，其實我連搵代母生都唔介意，但老婆抗拒，當然要尊重佢意願啦！」
此外，Kelly昨日足不出戶，在她的加多利山寓所門外守候了大批記者，就連其夫Alex和蝦餃仔都不見影蹤，但門外卻泊了一部凌志房車，車上放置了一部BB車，未知可是蝦餃仔的「私家車」。
採訪：丁寧、李志明
當歸川芎祛瘀回氣
陳慧琳懷孕五個月小產失孖女，身心受創，現時最重要是調理身體及處理傷痛情緒。若以中醫學角度來說，小產婦女先要祛瘀回氣，據註冊中醫師涂遠佑推介，小產婦女宜服用含當歸、川芎成份的「生化湯」來清除體內殘留的組織，忌吃寒冷食物。
剛流產的婦女不宜過急進補，因小產等同生產了，休養過後，下次經期後方可進補，但經期來的時間因人而定。涂醫生又指若流產的是孖胎，孕婦身體會更差，故必先供養身體的氣血。