有錢佬上床，唔一定係色情嘢嚟嘅，彭博資訊最近有篇專訪，話加州有個靠瞓喺床上賺錢嘅男人，想股神畢菲特上床，不過就完全同色情無關，佢只係想股神試吓佢製造嘅床褥質素有幾高啫！
試吓佢製造嘅床褥
話說EarlKluft出身於床褥世家，經常都會親身瞓吓自家製造嘅床褥，測試吓啲品質。喺花旗國住過嘅朋友，可能都會聽過佢間寶號E.S.Kluft&Company個名，佢哋嘅床褥至少賣2000蚊美金一張，最貴嗰張仲要成50000美金㖭！話時話，華華都想瞓吓，睇吓有幾舒服。
Kluft嘅床褥係全人手製造，家陣已經喺Bloomingdale's同Macy's呢啲百貨公司賣緊，每年生意額超過3億港紙；最近佢計劃進軍股神旗下傢俬舖RCWilley，想多個銷售點。咁點樣去吸引股神垂青？佢話想股神瞓上佢哋嘅床，親身試吓張床褥有幾得。股神出名點石成金，如果今次Kluft真係sell到股神，間公司俾佢睇中，隨時上市變埋藍籌都唔奇o架！