中旅（308）係超級現金牛，股價又跌到近1年低位，防風力應該夠強，兜底博盈喜。中旅上年6月底止，手頭現金近19.5億銀，銀貸得2.3億銀，揸住嘅淨現金高達17億銀，係超級現金牛一族。又中旅現價1.65元已經挨近1年低位，PB再跌番落1倍樓下，去到0.8倍，相對過去10年低位計算嘅平均PB係0.6倍水位，又開始貼近，防風力應該有番咁上下。又中旅2010年半年度（6月底止），純利升咗3.8倍到6530萬銀，呢個數額，兼且超過09年全年純利2810萬銀。
祖國經濟持續好景，加埋上年祖國總體旅遊經濟收入，按年增長咗16%。大圍有好景，相信中旅就快公佈2010年度業績，有得炒盈喜。呢轉兜底，博中旅上番1倍PB，目標價2.04元，潛在回報率24%。
堡獅龍玩轉短打
堡獅龍（592）到今年1月底止嘅淨現金高達3.9億銀，又係另一隻現金牛。又堡獅龍2011年半年度（12月底止），純利增長咗45%，到7260萬銀。消費市道暢旺，集團全年度純利起個孖到1.45億銀，無難度，而PE就跌到得番10倍，幾吸引。呢轉短打，吼實堡獅龍橫行區0.85元至1.04元炒上落，波幅上、下限回報率22%，預期PE都係12倍多少少。
錢雋