上個星期可以講係超級忙碌嘅一個星期,因為同team有兩位稱得上「一個打三個」嘅同事放假;換言之,成team突然要填補「六個人」嘅工作量,所以同事都好熱切期待星期五小周末嘅嚟臨。點知嗰日下晝突然傳嚟日本發生大地震,全team同事心情都一沉,因為其中一位放假嘅同事慳妹,就係去咗日本玩。
好彩慳妹機警,日本通訊科技又發達,電話唔通,慳妹就喺facebook報平安,大家先鬆一口氣,仲發揮番一貫投資者本色。見圓滙下挫,光頭仔話趁低吸納,反正年年都會同太太去日本旅行。
敏妮就問魏力,每次地震等災難後,好似啲災後重建股都會受捧,唔知今次會唔會呢?魏力即刻喺大利市機撳咗幾隻水泥鋼鐵股睇,果然馬鋼(323)、鞍鋼(347)已經逆市炒上,股市係聰明人嘅市場,反應極快,敏妮仲喺度問緊問題,聰明錢已經做咗嘢。不過,魏力就質疑,日本地震,會唔會惠及馬鋼、鞍鋼。唉,股王A成日話,股市炒概念,到你搞清楚時,炒家都已經贏錢離場。
日友人fb呼籲團結盡責
講番慳妹滯留日本,大家都留意住facebook,因為唔知慳妹有乜需要,會唔會喺facebook度求救,敏妮咁啱見到另一位曾經留學日本嘅朋友,喺facebook度轉載佢一位日本舊同學嘅呼籲,大意係話「天氣雖然凍,但大家着多件衫唔好開暖氣,一齊為節能努力,喺困難時候,大家要團結盡公民責任。」充份體現出呢個生於災難嘅民族,團結、有教養、有公德。
敏妮諗番前嗰排遊行嗰班年輕80後,touchwood講句,假如香港有天災發生,佢哋會團結共患難,抑或係上街搞事發洩呢?
溫敏妮
http://wanmanli.com/blogs/