呢個3月，每個禮拜日政府總部都有遊行，不過唔止港島一片反對聲，噚日喺旺角行人專用區，八方就見到中港家庭權益會一班成員喺街頭做宣傳，問問組織者曾冠榮，佢話唔止財爺曾俊華乞人憎，食物及衞生局局長周一嶽一樣要聲討。
盛惠最少三萬九
話說周局長早前話，要調高內地人士來港分娩嘅價格，聽落就對香港人好公平，但實際上政府係將港人內地配偶當作內地人，中港家庭要生仔就盛惠最少三萬九，結果又係會搞到民怨四起。
曾冠榮話，噚日特登揀旺角做宣傳，貪呢度四通八達，可以接觸更多中港家庭成員，勸佢哋今個月27日去政府總部，遊行鬧爆周一嶽。