開心飛起：首爾人逼逼　落地鐵買餸

不可以飲食的港鐵裏，手持食物都會被卧底站務員跟住，隨時罰你五嚿水，我時常覺得：「有咩居心呢？」首爾地鐵呢？有冰凍鮮魚、新鮮（滴住水）紫菜、海帶同新鮮「出土」人參，晒你冷，夠薑，你咪即刻食囉！

記者、攝影：陳慧敏

二、三、四車廂變市集

首爾財經新聞經常說韓國人太多，土地不敷應用，於是動動腦筋玩crossover！話說有回去清潭洞（Cheondam）shopping，列車駛入月台減速時不禁問：「因乜咁多買餸托米師奶等車？」望真，對面線的列車車廂中門大開排滿了小攤檔，新鮮水果、無添加蜜糖、自家辣椒醬，意粉同密實盒自家泡菜！豬肉榮拿住刀斬切牛肉，賣魚勝在推銷鮮魚，座位也塞滿橘子箱……原來首爾市場不夠用，於是每月第2及第4個星期二、三、四，清潭洞這列車廂都變成市集。

■無添加花粉，據講能醫百病強身健體，每罐約$400。

■阿妹家製造的蕎麥麪，有芝麻、綠茶同烏龍茶味。
各約$14

即買即食o殊o殊聲

來擺攤的都是鄰近農民，好似日本小鎮的朝會般擺賣自家農場種的水果蔬菜或自家製造的糕餅、糯米糍等。包裝都是自家製，貼個貼紙，非常無添加。但同時大家都只會說韓語，拿起包麪條阿妹，一手揸碗一手揸筷子，o殊o殊聲地吃起來。我知道是麪啦，是甚麼味？阿豬媽即刻走過隔籬車廂，搶劫了一家的黑芝麻跑來給我看，哦，明晒！有口難言，都幾好玩吖！

■還有人參？最厲害是老闆就這麼放在地上便走開了，不怕被偷？

地址：清潭洞77-76號
交通：乘7號線直達清潭站（Cheongdam）便是
營業時間：每個月第2及第4個星期二、三、四，下午3時至8時

地下水種士多啤梨

現在3月，同是超甜士多啤梨成熟的季節！不過今年氣候反常，寒流來早了，士多啤梨收成反而遲了。這個觀光文化體驗場的士多啤梨長得不大，但咬起來汁多到漏出嘴，超甜！原來利川市一帶有地下水，水溫二十多度，因礦物含量不高，不算是溫泉，但優質溫暖泉水就種出紅卜卜又多汁的士多啤梨。
入場費：約$35，包入園摘果和1kg士多啤梨