日本宮城大地震災情嚴重，原本在東京的Angelababy及在大阪的彭浩翔等，已相繼離開日本。Angelababy昨午平安返港，她回憶在日24小時，猶有餘悸，半夜在酒店不敢除鞋、不敢瞓，攬住手袋等天光，更想過會死在日本。
日本大地震前日發生，滯留東京的Angelababy昨日安全乘坐JL早機，由羽田機場起飛返港，比原定時間遲了半小時抵港。Baby戴上黑超、化淡妝，講述過去24小時地震經歷，猶有餘悸，她說：「我日本屋企喺四樓，地震時企都企唔穩，又有啲人尖叫，咪衝落樓下。喺街見到啲電線好似頭髮咁，喺天空飛吓飛吓，等震完，即刻返上樓拎嘢。」
「唔敢除鞋唔敢瞓」
Baby指當時有兩個日本同事陪着，晚上餘震不斷，她有少許面青青說：「夜晚仲恐怖，不斷有餘震，啲震係越來越頻密，電視、電話不斷有響聲警報，所以同事帶我轉去住酒店。」她形容沿路恍如災難片，滿街企滿人、塞滿車，只能靠朱古力和餅乾充飢，去到酒店也不敢睡，她說：「唔敢除鞋、唔敢瞓，攬住個袋喺床度，成晚聽到『唧』『唧』聲，係大廈搖晃。」
不過Baby謂並非首次在日本遇上地震，她說：「今次係上天畀我經歷嘅一個原因，我會更加珍惜生命。初初震時，仲諗自己會唔會喺日本死。我仲有好多嘢未做。」如結婚嗎？她說：「好多嘢未做。」經理人Kim透露會放Baby幾日假，等她回家陪媽咪和休息定驚。
彭浩翔平安返北京
導演彭浩翔昨日凌晨由大阪平安返回北京，他前晚在酒店等候時指：「餘震不止，今晚開燈睡，食物、水、衣服放床頭。」他又指地震時很驚，是第一個走入枱底，又形容事件如村上春樹《1Q84》內形容般不真實，他又不忘讚揚日本國民的自律和衞生。
曾一度失去聯絡、自言「爛命一條」的杜如風，在微博向各界報平安，又嬉笑怒罵說：「今次返到嚟東京，全程好似坐緊遊艇咁...搖呀搖...搖呀搖...不停起勢係咁搖...快啲搖到青馬大橋。」
採訪、攝影：顏英儀、葉雪