財經事務及庫務局局長陳家強果真人如其名，上個星期三喺立法會「儍吓儍吓」，令臨時撥款決議案破天荒流產收場，成功為香港締造「歷史」。唔少建制派事後踢爆儍強事前一張票都冇箍過，證明係佢計錯數先令政府大失預算；儍強似乎唔順氣，噚日罕有撰寫網誌反駁，聲稱無論係佢主動撤回決議案抑或要表決，結果都係被否決。原來儍強除咗儍，仲鍾意撐飯蓋！
被嘲笑 左右不是人
原來儍強對上一次喺「局長網誌」撰文，已經係舊年12月嘅事，儍強3個月後再寫blog，似乎係有道寃屈氣要抒發。咁又係嘅，決議案被否決之後，事先頻頻「提水」嘅泛民主派笑佢唔夠「醒目」，話佢可以主動撤回，建制派亦怪責佢冇盡力箍票，兩邊都將佢當笑柄，難怪要高調澄清。
佢噚日發表一篇題為〈一場不必要的風波〉嘅文章，已經好有卸責意味，再睇內文就發現佢死撐自己冇錯，事關佢指摘泛民主派當日發言時只係重申反對預算案嘅立場，同呢項純技術性嘅決議案根本冇實質關係，又話佢哋提到要小心否決臨時撥款嘅影響性，所以冇理由假設議員會唔支持而主動撤回決議案。而佢個人認為最重要嘅一點係：無論係主動撤回抑或決議案被否決，都係一樣要向立法會再重新提交決議案，時間上冇分別，所以佢決定要畀議員憑判斷投票喎。
唔認錯 辯解為甩身
嘩，乜政治問責官員唔係要及早化解政治危機咩？如果成個政治團隊好似儍強咁諗法，都唔使做任何游說同箍票工作啦，齋等政治炸彈爆炸咪得囉？呢種強詞奪理嘅辯解明顯只為甩身唔使問責，民主黨張文光都話儍強直頭係「死雞撐飯蓋」，自己漏招又唔肯認錯，質疑儍強當日只係齋坐喺立法會發夢，見到唔夠人投票都冇執生。相對鬍鬚曾噚日以〈反思〉為題嘅網誌，儍強似乎比佢上司更死不悔改。呢隻政治黑鑊，當然唔係死撐幾句就可以卸得一乾二淨。