陳慧琳（Kelly）昨日承認日前不幸小產痛失腹中孖女，圈中好友及fans心痛之餘紛紛送上祝福。當年劉美娟出世不足24小時的小兒子夭折，她以過來人叮囑Kelly要發洩情感，家人陪伴及支持亦很重要，首要是養好身體愛惜自己。
自從陳慧琳公開表示經人工授孕懷有孖女後，她已減少工作專心養胎，正當大家滿心歡喜等Kelly孖女來臨時，昨日她卻宣佈日前不幸小產，痛失孖女。消息公佈後Kelly圈中好友皆表震驚，紛紛戥她傷心之餘亦送上慰問。
「想喊就喊」
劉美娟05年為丈夫張崇德誕下兒子，怎料不足24小時卻夭折，當年她大受打擊甚至表示不敢再生，但現在已再為人母的娟妹，昨日得知Kelly不幸小產時說：「聽到好難過，我想像到佢壓力會好大。」娟妹直言現在Kelly的心情絕非人人明白，現在最重要是家人的陪伴和理解，她續說：「其實最難面對亦係身邊人，可能好多老人家會有好意嘅慰問，但正如當日我聽到反而覺難受。生命係唔可以用另一條生命代替，我覺得佢如果真係想喊就喊，誠實面對自己嘅感受，唔好理外邊嘅人。」
除了心理外，娟妹表示生理同樣重要，她寄語Kelly：「唔好畀自己身體唔好，當年我每晚盡情咁喊，喊到冇晒眼淚就同老公祈禱，再畀自己好好休息，最緊要保重身體。」娟妹相信Kelly必定是考慮妥當才公佈事件，娟妹謂：「講咗處理咗都係好事，佢家咁理性處理，Kelly係一個正面嘅人，唔使為佢擔心。」
要如常生活
另外06年廖啟智和太太陳敏兒的幼子文諾不敵血癌病逝，智叔得知Kelly小產痛失孖女時說：「有時人可以掌握嘅嘢真係有限，唔係有計劃就可以完成。心情沉重唔開心就當然，但都要如常生活，佢係需要啲時間同搵寄託。」他亦寄語Kelly養好身體才是最重要。至於太太歐倩怡早年曾小產的郭晉安謂：「唔好氣餒，佢仲咁後生。家Kelly需要朋友鼓勵，家人畀多啲支持同陪伴。」
採訪：葉雪、比華利
