商場攻略:投資30萬創業 朱古力店2年回本

商場攻略:
投資30萬創業 朱古力店2年回本

「工字不出頭」,Pearl大學畢業4年,在工作崗位未見起色,希望尋求突破,05年以積蓄30萬元,開設手工朱古力店,針對遊客及公司客成功「殺出血路」,每月平均營業額達20萬元,旺季更高達40萬元。
記者:陳皓怡 攝影:梁鑑章

「見到屋企人由後生到退休都係打同一份工,唔甘心。」Pearl沒有家庭負擔,加上年輕輸得起,又有一筆積蓄,故創業做老闆,「做唔住咪出番嚟打工,唔驚輸,因為輸得起。」押上的除了青春,還有真金白銀。
「開朱古力舖其實幾複雜,譬如要有個朱古力櫃,將朱古力保持喺最好狀況。朱古力櫃溫度要控制喺18至20℃,濕度又要控制喺60%,唔係普通喺上海街買嗰啲餅櫃,要喺外國訂造。」Pearl花了一年時間籌備,總投資額約30萬元(表1)。

不少公司客及準新人找Pearl設計朱古力。

Pearl說,港鐵站人流較商場多,而且不乏遊客。

揀港鐵舖貪人流

為何選擇開設朱古力店?「賣蛋糕,擺一、兩日就要丟,朱古力保存期長啲,唔會嘥咗啲貨,而且朱古力可以跟order做,結婚回禮你唔會派西餅,公司周年晚會唔會派西餅畀同事。何況,一般大牌子賣嘅20、30蚊一粒,我啲原材料一樣喺歐洲入口,然後喺香港做,成本可以減低,我哋平均都係賣幾蚊,有得做。」
05年聖誕開業,「開舖時好多客嚟搵我,可能喺5年前香港冇乜朱古力店。我賣得平同埋得意,有貓仔、波鞋、手袋呢啲款,吸引好多人幫襯。」試過1個月營業額近40萬元(表2),但踏入零售淡季,人流減少,生意漸走下坡,加上消費者貪新忘舊,靠公司客挨了兩年才回本。其間Pearl的營業額僅夠交租,她要靠積蓄維生。
碰過釘後發現人流重要,故店舖由原先位於新港中心,搬到尖東港鐵站內,選址港鐵店舖原因係,「商場嘅人流唔及車站多,商場租貴,不過人流未必有保證,好旺嘅又唔輪到你入,就算次一等嘅商場,租金都未必平。」每日經過尖東站的乘客,絡繹不絕,不愁人流。另一優點是可以做多點遊客生意,「朱古力通常係一個gift,好多日本、韓國遊客都會買嚟做手信。」

淡季要靠公司客

不過,地舖租金高昂,小本經營並不容易應付,Pearl卻沒有搬到樓上舖的打算,「有個舖頭畀人睇到都幾緊要,公司客、結婚客都會嚟睇辦,睇一兩次先落單,呢間舖可以方便佢哋嚟睇,如果搬咗上樓,曝光少咗,啲人要靠網站,或者上樓㩒鐘搵你,始終差啲。」
除了「生客」,Pearl亦專攻公司客,「其實開舖幾個月已經開始有公司客接觸我哋,或者一對就嚟結婚嘅夫婦問我哋做唔做,當然做啦,所以設計一系列結婚款,公司客同公關公司就一個搭一個。」現時該公司6至7成營業額來自公司客。

由於價錢較其他品牌便宜,加上多款式,單月營業額曾達40萬元。

供貨商拒無知客攞貨

以為做老闆可蹺埋手只發號施令,「執貨、清潔、送貨、包裝一腳踢。」以為做老闆最開心接到大定單,「開舖無幾耐,接咗單2000件嘅生意,嗰陣旺季,又未請到人,試過5日不停做包裝,由朝早7點起身包,到夜晚12點,瞓完覺第二朝又起身包過。」老闆不易為!

入場門檻高競爭細

香港的手工朱古力店大多是國際知名品牌,Pearl坦言難找入貨渠道,幸好有在內地朋友,介紹一家香港工場供貨給她。雖有朋友援手,但由於工場為酒店提供朱古力,故並非每個叩門的客戶都供貨,「如果你好無知咁樣,佢都唔會睬你。佢哋要求你對朱古力有一定認識,譬如朱古力豆邊度出產最好,最大幾個品牌叫乜名,朱古力最理想保存喺乜嘢溫度同濕度。」
由於行業需要一定專業知識,故競爭對手相對較少,Pearl說,曾經出現過幾間對手,不過最終捱不住,「可能佢哋比較local,有啲女仔識做朱古力,自己做起拎出嚟賣,規模細所以做唔到order,同埋質素都比較粗糙。」