賭王何鴻燊嘅分燊家事件有新發展，前晚四房同賭王發出聯合聲明，宣佈各房取得共識，和解收場。賭王一向關心家人，要求家和萬事興，解決咗爭產問題，下一步唔知會唔會插手處理近排緋聞連環爆嘅乖女超雲？
唔認共度佳節
超雲被爆同無綫男藝人陳山聰發展地下情，34歲嘅山聰仲被揭為冧超雲狠撇結婚三年、40歲嘅PonnyYeung，此舉令山聰上榜成賤男。「雲山戀」其實早有迹可尋，超雲同山聰喺情人節當晚分別上載餐枱相，一支冰凍香檳踢爆佢哋當晚熱情對飲。
山聰保留雲山戀發展空間，不過唔肯承認情人節同超雲一齊過，佢前晚喺電話中話：「全世界都用嗰啲香檳桶。」對於有報道指山聰搭上有米超雲後，既換寶馬，又搬入賭王三太陳婉珍名下嘅陽明山莊，山聰回應：「好無稽，我有能力買車，住邊度唔使同人交代。」佢仲話之前否認同超雲相識，因為覺得交朋結友唔使同外界交代。
網友微博力撐
雲山戀曝光，山聰獲網友喺微博留言力撐，佢噚日回覆：「多謝支持！」超雲噚日都喺微博留言：「人生總有無奈，惟有樂觀去面對！我不想說太多，堅信日久見人心！」這對熱戀男女噚日未有公開露面，賭王噚日就留喺三太屋企休息，而噚日朝早二房女兒超瓊同超蕸就去咗探老竇，坐咗唔夠一粒鐘就走。