07年出道的組合糖兄妹，因為新碟封面而人氣急升，樣貌娟好的糖妹獲封為新一代高登討論區女神，連兩人戀情也被高登仔評頭品足。正當人人同情糖兄做糖兵，偏偏他有拍拖六年的女友。女神糖妹青春無敵，卻呻冇拖拍兼食檸檬。上得高登，真係別太認真。 撰文：李珮洳
二人組合糖兄妹的糖妹黃山怡（Kandy）近期升呢成為高登討論區新一代女神，講到這個話題，糖兄（潘雲峰）說：「話說因為糖兄妹一隻專輯放喺HMV賣，我個頭咁啱俾個110蚊嘅黃色圓形貼紙遮住，就係咁開始，引起網民討論我哋。」
讚高登仔創意高
一隊出道三年的組合突然被高登網民惡搞，不時將糖兄醜化，指他想力追糖妹，繼而為他改名為糖兵，糖兄不怒反笑說：「覺得佢哋好勁、好有創意，有時睇到佢哋將我哋移花接木啲相，我笑咗，特別係將我同阿妹個頭調轉嗰張。」
原來糖兄一直都是高登fans，他自爆有幾個account：「有時我會喺網民寫我哋嘅post度留言，當然我唔會話畀你聽我用乜嘢名啦，只係會寫『哈哈哈！』再加個哈哈笑公仔。」
對於自己的樣被貼紙遮住，糖兄完全不介意，他舉例說：「好似日本嘅EveryLittleThing個製作人，好多時喺隻碟度係blur到睇唔到個樣，一隊組合唔一定要成隊人並排咁喺隻唱片封面上邊。」
糖妹Kandy近日升呢成為高登女神，對此榮耀她不敢高攀並笑說：「我唔覺得自己係女神喎，女神嘅定義係上圍比較大，我又冇長腿，我心目中嘅女神係Angelababy同周秀娜，Baby少女啲、周秀娜係性感嘅icon。」
冧男模求愛不遂
講起糖兄被指想追糖妹，他坦言有一位拍拖6年的女友，且有結婚的計劃。23歲的Kandy則表示恨拍拖，更自爆曾向一位男模特兒表白：「我鍾意一個人就會講，咁耐試過表白兩次，唔好以為女追男好易呀。之前一個就拍咗幾年拖，第二個男仔聽完我表白即時deadair冇出聲，仲話大家都係呢一行，唔好一齊，我求愛不遂。」
此外，Kandy入行以來被指貌似陳慧嫻，她聽過這番說話很多次，不過糖兄即反駁說：「陳慧嫻靚好多。」Kandy指有人認為她似郭羨妮、陳嘉寶（Anjaylia）及官恩娜。
重演慧嫻《反叛》Look
由於糖妹（Kandy）一直被指似陳慧嫻，所以今次要求她扮演陳慧嫻其中一隻大碟《反叛》的造型。拍攝時Kandy表現得十分認真，為了出來的效果更理想，她事前將一頭長髮紮起。《反叛》的唱片封面當年是於柏麗大道取景，Kandy亦應邀到同一地方拍攝。影相前，Kandy主動要求看清陳慧嫻擺的甫士，就連手的擺位都希望跟足慧嫻的唱片封面。
娛樂資料庫：倒模生力軍
江山代有人才出，一代新人似舊人。雖然當今樂壇生力軍的實力，遠遠比不上八、九十年代的前輩，但至少樣貌也有幾分相似。
糖妹vs陳慧嫻
糖妹經常被笑似剛出道的陳慧嫻，同樣是天真活潑類型。說到底，最似的還是兩人的身高。
蔡卓妍vs許秋怡
蔡卓妍（阿Sa）和許秋怡基本上是一個餅印，不過阿Sa要唱《現代愛情故事》就要找舞王陳偉霆拍檔，希望他們不要像前輩一樣分手收場。
G.E.Mvs甄妮
實力見稱的G.E.M（鄧紫棋）和甄妮，同樣被冠為「巨肺」，除了本身擁有無窮無盡的氣之外，也擁有驕人的身材。
衞蘭vs杜麗莎
杜麗莎是中菲混血兒，衞蘭更溝多一點韓國血統。不過講到中氣及火氣，當然是薑越老的辣。
資料來源：《蘋果》資料室
