失職呢啲嘢，只可一，不可再，財經局局長儍強為免烏紗不保，喺本周三立法會歷史性否決臨時撥款決議案後痛定思痛，補鑊急call身在北京嘅人大同政協南下勤王，出席噚日會議保駕護航。
自由黨劉健儀同經濟動力梁君彥都算唔話得，噚日早機到港，晚機返京，花半日時間遊飛機河，雖然政府大派6,000蚊啫，但都未夠錢買機票，噚日有記者問梁君彥會唔會向政府攞返機票錢，佢笑笑口話，唔知可唔可以喺預算案內包埋呢條數，畀議員claim返機票錢？
其實政府要穩陣，八方建議下年最好派包機上京，有需要時接載人大政協返港履行橡皮圖章責任，點睇都緊要過打救滯留英國嘅學生啩？心水清者發現，北上冇投票嘅建制派中，只有黃宜弘唔係人大或政協，根本冇公職在身，佢噚日承認上京只係「開心吓」，宴請人大或記者到其京城大宅飲酒，臨時預算案蝦碌，佢話諗落自己都要負啲責喎。