農曆二月十五日（下周六）係道教道祖誕，即係太上老君生日，香港道教聯合會聽日先搞花車巡遊暨第十一屆道教節開幕禮，為連串慶生活動揭序幕。今次花車巡遊係大製作，七架花車由不同道教團體負責，各自請出道教諸位神仙出嚟見吓善信，包括香港人好熟識嘅黃大仙、車公、天后娘娘、太上老君、譚公等，屆時滿街神仙，都算亞洲國際都會奇景。
道聯會今年會繼續向政府爭取將道祖誕列為法定假日，主席湯偉奇道長話，去年特區政府回覆稱會考慮，希望今年港府會有更積極回應，可以研究呢個建議。湯道長稱會不斷爭取，因為道教係中國人嘅本土宗教，既然聖誕、佛誕都有假放，冇理由道教冇份。打工仔信乜嘢神佛都想放假，老闆未必咁諗喎，湯道長你話係咪？