鄭威濤，和之味飲食集團董事總經理，旗下有板長及板前等壽司店。他最廣為人認識的是，多次投得瀕危絕種的藍鰭吞拿「日本一」，贏得知名度亦換來環保人士咒罵，甚至在網上發起罷食行動。環繞鄭威濤的是非，豈止於此，旗下食肆被食環署暫停營業，與前妻的官司甚囂塵上，他一概處之泰然，「有我個名就係宣傳」。
記者：黃碧珊 攝影：程志遠
「最初去攞貨，啲供應商對我哋無信心，話唔可以直接賣貨畀海外公司，就算畀埋錢先都唔肯。」開日本壽司店是鄭威濤的理想，壽司店尤其着重新鮮食材，「啲貨唔好，畀最叻師傅整都唔識飛。」為了可在日本直接入貨，鄭威濤要在日本爭取知名度，以港人身份投得「日本一」，令他一舉成名，「家好多日本人都識得我，有縣政府向我哋拍門，叫我用佢地方嘅嘢。」
不過，由於藍鰭吞拿瀕危絕種，投得「日本一」亦激發環保人士不滿，在網上發起罷食藍鰭吞拿，一切衝着他而來。其實，早於08年首次投得「日本一」，鄭威濤已感受到壓力。「07年籌備東京第一間分店時，知道外國公司都可以投，又搵到出市代表，咁就去投。」最終以607萬日圓（當時約43萬港元）奪得，在香港得到各傳媒大肆「報喜」，但在日本則被當地人批評，「話攞晒啲好嘢走。其實我07年尾已經開咗赤坂板前，有半條留番喺日本。」
抗罷食 港以外分店出售
為減低日本人的反感，鄭威濤翌年開始，與認識的久兵衞壽司店合作競投。從09年至今，「日本一」均由鄭威濤及日本夥伴投得，今年更以3249萬日圓（約308萬港元）奪得。以日圓計，較首次投得價高逾4倍，打破築地99年以來紀錄。不過，雖然刷新紀錄，但香港報章對事件報道不多。對於相關報道逐年遞減，鄭威濤不以為然，「下年都會繼續投，但唔拎返香港，新加坡、中國、日本都有分店，投完咪畀佢哋食，唔好分國籍，都係我嘅客。」
能以積極態度面對眼前困難，只因訓練有素。早於05年，鄭威濤旗下壽司店曾因員工染上痢疾，被食環署封舖暫停營業。08年又因壽司蛋出問題，再被查封，「當時最難捱！唔理乜嘢原因，要做好內部清潔同個人衞生，要積極面對，無其他方法，惟有等食客接受番你。」
最難捱 旗下食店被查封
知名度令食店廣為消費者熟悉，但與前妻的訴訟，亦因個人知名度，由私事變成「新聞」，「公司嘅嘢已經進入法律程序，無得回應。佢（前妻）講就由得佢講，我唔需要回應，喺香港，講嘢無罪！雖然我得嗰四十幾歲人，但已經睇得好化。」
俗語說，「人怕出名豬怕肥」，鄭威濤卻說：「食得鹹魚抵得渴。」對他而言，「負面都係報道，總之出我個名都係同我公司做咗廣告。我明白大家（傳媒）都係搵食，有個尺度就得。」
鄭威濤簡歷
1986年 入行
1988年 赴日學藝
1990年 回港做導遊
1994年 引入日式班戟店
1996年 班戟店結業，夥友人引入日本味千拉麵
2004年 開設首間板前壽司
2006年 引入雪村串燒
2007年 在港開設首間板長壽司
2007年 在日本及澳門開板前分店
2008年 首位港人投得「日本一」
2009年 引入岡田珈琲
2009年 開首間自家烏冬專門店
2010年 與友人合資開板獎自家火鍋
近年「日本一」拍賣價
2008年
拍賣價＊：607萬日圓（約43萬港元） 重量：276公斤
2009年
拍賣價＊：960萬日圓（約82萬港元） 重量：128公斤
2010年
拍賣價＊：1628萬日圓（約136萬港元） 重量：232公斤
2011年
拍賣價＊：3249萬日圓（約308萬港元） 重量：342公斤
註：＊折合價按當時滙率計
刻苦當學徒博赴日學藝
鄭威濤首次品嚐壽司，是中學時期，「中三嗰年運動會，有同學請我哋幾個人去佢爸爸間壽司舖食lunch，嗰時壽司好貴，食唔起，一食覺得好好味。」加上當時大部份年輕人都深受日本文化影響，鄭威濤中四便到同學的壽司店當學徒。
越心急越唔教
「如果你唔出嚟博，唔行快兩步，唔肯蝕底，會無乜前途，尤其喺香港，我好細個已經係咁諗。」為博師傅帶他一同赴日學藝，「返工時間由下晝6點半到凌晨4點。我6點返到去，所有下欄嘢擸晒嚟做。好多師傅都係咁練出嚟，越心急想學嘢，通常越唔教，費事教識徒弟無師傅。見呢個o靚仔咁勤力，有前途，反而仲會教你啲秘訣。」
由於任勞任怨，鄭威濤終於可跟師傅一同到日本，但做學徒即使每月加薪，積蓄亦僅萬餘元，不足以應付日本生活費及學費，「問阿爸借萬幾蚊，話去日本學正宗啲，佢點都唔肯，最後問阿媽。」帶着辛苦得來的3萬餘元，鄭威濤跟師傅赴日，「我去之前學咗兩個月日文，都講唔到，啲壽司舖唔肯請我。帶去嗰幾萬蚊，捱得幾個月貨仔，惟有成日揸住本字典，日咪夜咪。」經過約兩個月後，終在機製外賣壽司店找到工作，3個月後日文較流利，跳槽到拉麪店，最終在歌舞技町一家高級壽司店任學徒。
回想學藝時，面對3名日籍師傅，「最初會覺得佢哋恰我，家諗番，佢哋對我嚴格係好事。」嚴師出高徒，鄭威濤的日式連鎖店得到外間認同。不過，現在的鄭威濤似生意人多於壽司師傅，還有沒有親手做壽司？「間唔中，去到舖頭會自己整，做壽司係一種樂趣。」
創業賣班戟
辛苦到日本學做壽司，偏偏學成歸來，鄭威濤不做壽司，「返嚟有壽司舖用萬幾蚊請我，比起走時得3000幾蚊，已經加咗好多倍。不過，我唔做，我要搵多啲錢，大部份做飲食嘅都希望有自己舖頭。」
不做壽司，他跑了去當導遊，「90年代初，日本環境好，初頭都係跟吓，之後每個月有5、6萬，好市嗰陣仲有成10至20萬。」兩年後，日式班戟店在日本盛行，鄭威濤將它引入香港，原因同樣是盈利高，「開班戟店成本平啲，只要30、40萬就可以開一間，當係入門版。不過，呢啲小食熱潮好快就過，可能自己經驗唔夠。」
壽司已成港人必需品
班戟店結業，96年與朋友合資引入味千拉麵，「雖然唔係理想（壽司店），但透過特許經營，可以學到點樣運作盤生意。」儲資本、儲經驗，終於在04年開設迴轉壽司店。
「Itamae（壽司師傅）日文漢字係板前，壽司師傳整壽司（意念）幾好喎！」其後再開、咖啡、烏冬等日式店舖，「啲客當迴轉帶上面壽司係裝飾，開『板前』有師傅喺面前整。其他嗰啲係我為食，帶返嚟香港。」
面對日式飲食店競爭激烈，鄭威濤充滿自信，「有市場先開得多，呢啲係定律。家壽司係香港人必需品，好多人每個禮拜要食一次，就算唔係好鍾意食，點都會一個月食一次。我睇好壽司呢行。」