自從特首煲呔聲稱被襲擊後，政府提升高官保安戒備，緊張程度已達草木皆兵地步。維園香港花卉展覽噚日開幕，特首夫人曾鮑笑薇主持開幕禮。春暖花開，原本係好溫馨嘅場合，但警方同康文署就如臨大敵，八方見到最少有六個男女G4便衣警員貼身保護，康文署又出動大批保安重重護駕，曾太仲安全過溫室中小花。
市民埋怨阻住
出動咁多人守護曾太，八方相信係因為民政局德成局長冇出席噚日典禮，否則佢一夫當關，絕對唔驚80後踩場。而現場有好多90後甚至千禧後，因為大會安排中、小學生到場寫生，佢哋好聽話，冇大嗌「我都要食飯，我都要6,000蚊」，曾太可以靜心賞花。
不過有個別學生向八方表示不滿，因為場內唔少太陽花已經謝謝哋，花展首日就殘晒，有冇搞錯！曾太在維園賞花，大隊保安人員約30人浩浩蕩蕩幫佢開路，有市民見到咁大陣仗，以為發生咗乜嘢嚴重事故，亦有人覺得殺風景，埋怨有人搞特權，「貴人要睇花，我哋就要讓路」。花展直至3月20日，想避開達官貴人，可揀其他日子去賞花。