特區高官言行，有時真係出人意表，唔通估佢唔到先係最高境界？噚日下晝日本發生史上最強烈大地震，好多香港人視日本為第二個家，因此全城關注災情。包括八方在內，大家透過電視螢光幕睇到日本受海嘯襲擊，忽然間天昏地暗，好似災難電影《2012》、《日本沉沒》世界末日場面咁，心情真係好難唔受影響。
呼籲投資者要小心
日本災情仍未明朗之際，噚日黃昏，財爺鬍鬚曾忽然召開記者簡報會，傳媒以為佢講臨時預算案風波，又或者講在日本嘅港人情況，點知鬍鬚曾原來講股市。市民關心在日本親友安危，鬍鬚曾卻話香港股市幾波動，不過成交及結算操作仍然有秩序進行，又滙報亞太區市場情況，做乜司長客串做咗財經記者？
鬍鬚曾之後變身分析員，指地震對經濟唔會有長遠影響，但會關注地震對各行各業造成嘅影響，又話星期一開市股市可能會波動，然而好多嘢家仍然睇得唔係太清楚，佢呼籲投資者要小心。可能不滿鬍鬚曾冇講到人人關心嘅港人情況，有人問八方，點解鬍鬚曾講埋啲咁嘅嘢，亦有人在網上留言，指鬍鬚曾竟然連一句慰問災民嘅說話都唔講，好失禮。
政府消息人士解話，稱早已預料鬍鬚曾出來講話會被人指「抽水」，不過都冇辦法，因為金融海嘯之後，港府制訂咗個金融預警機制，當外圍市況好波動嘅時候，港府就會啟動機制，財金官員密切注視外圍市場變化，噚日下晝滙市雖然未見異樣，不過港股最多跌逾500點，雖然冇震散個市，但星期一開市唔知會發生乜事，恐防人心虛怯後果可大可小，因此財爺要企出嚟講啲嘢。
下月提不信任動議
鬍鬚曾露面能否穩定人心，下禮拜睇吓市場反應先知道，八方覺得鬍鬚曾可能更關心逼到埋身嘅地震，因為民主派下月向他提出不信任動議，呢場震央在特區嘅政治地震，動盪將觸動北京神經，即使有保皇黨力保，跛腳鴨政府餘下日子，相信都要坐輪椅。
mailto:[email protected]