許志安和鄭秀文（Sammi）過去20年在感情路上捉迷藏，近日終於重燃愛火，親身演繹一幕《唯獨你是不可取替》，二人被愛情滋潤，自然綻放含春笑容，安仔被喚作「春天安」，一年之計在於春，春天安翻撻鄭四萬，雖未有結婚大計，但他直言期待與Sammi共迎美好將來，到花開結果時，他們要改唱張學友的《你的名字我的姓氏》才貼切。 撰文：比華利
愛情的魔力從來無法估計，過去半年dry爆的中男許志安最近在愛情路上重遇熟女舊愛鄭秀文，化學作用，二人齊齊回春，風騷爆棚。自上周四他們被本報獨家踢爆拍拖到佐敦太平館甜蜜撐枱腳，鐵證復合後，安仔日前終親口證實戀情，為維護女友，他懇求大家給予時間和空間，因為失去過方知珍惜，安仔決意用實際行動永遠留住惟獨她是不可取替的Sammi。
尷尬抗拒春天安花名
安仔將於5月底舉行演唱會，在這個敏感時候宣佈復合，經過連日傳媒向他大逼供，安仔最終大方分享愛的心聲，面對鏡頭時真情流露地含春笑容，換來「春天安」的新朵，身邊助手拍手認同，當事人春天安卻聽見打冷震。唱片公司日前碰巧又安排安仔在發情地佐敦接受訪問，春天安換上粉紅上衣拍照，身上打扮正好呼應此刻心情，難怪他擺起甫士，舉手投足如沐春風。
訪問開始，春天安抗拒大家這樣叫，他渾身不自然說：「我唔鍾意呢個朵，我覺得好娘。」邊答邊笑到四萬咁口，倒不如換叫「許四萬」？安仔依然搖頭：「哎吔，乜名都唔好，大家可以叫番我『老鼠安』最好。」
Sammi在太平宣言中坦誠發放恨嫁訊息，38歲的她希望安仔是她最後一個男友，並順利轉換身份為許太，讓感情開花結果。男大當婚，現年43歲的安仔想了想才說：「太長遠，我未諗，只係想順其自然。」難道不怕再錯失良緣？安仔收起笑臉慎重說：「正如Sammi同大家講咗，我哋之間有共識，始終分開咁耐，希望大家畀少少空間同時間，等我哋重新開始認識大家，我哋真係好需要時間同空間去磨合，家諗唔到未來。」
「冇人唔想有美好將來」
安仔解釋只是覺得時機未成熟，並非採拖字訣，他強調每次拍拖也視愛侶為結婚對象，所以今次與Sammi復合，結婚大計心中有數，但他按捺不住記者反覆追問，才情深表白：「冇人唔想有美好將來，今次正式講一次，希望大家會明白。」據知安仔於5月底的演唱會上，指明要設計師TomasChan度身訂做一套踢死兔禮服，莫非預告在紅館爆婚訊？他尷尬否認說：「唔好諗太多。」
有傳安仔計劃8月與Sammi到法國秘密結婚趕生仔，他聽後隨即尷尬臉紅說：「真係未住，8月我會同BigFour去美國做巡迴。」可怕被傳轉軚到美國拉斯維加斯秘密註冊？安仔雙手掩臉作投降狀，封嘴避談，但承諾將來結婚必會公開，他實牙實齒說：「我嘅性格，開心事希望同大家分享。」
翻撻Sammi後，問安仔可有再拜會女友家長？他說：「呢個問題答唔到你，喺呢段時間，我只希望涉及我哋兩個人先，想互相感受吓先。」理所當然，拍拖誰不想享受二人世界，Sammi雙親為女兒幸福，相信會通氣明白。
髮型：SunnyofHairCulture
化妝：MaggieLee
服裝：Harmont&Blaine
場地：Balie（彌敦酒店）