對愛華頓嚟講，爭取好成績最重要嘅元素，係佢哋嘅「黃金中場」線，但係周三晚英超迎戰伯明翰，再有「黃金戰士」阿迪達加入十字軍名單中，成條「黃金中場」散晒。另外，呢場波仲有搞笑嘢，就係球證禾頓上半場唔記得帶黃牌，搞到喺42分鐘出張隱形黃牌警告伯明翰嘅梅治。
逼和伯明翰1:1
「拖肥糖」喺呢場聯賽鬥「阿伯」之前，已經有卡希爾、費蘭尼同埋隊長菲臘尼維利都因為不同程度嘅受傷，唔能夠披甲上陣，基本上「黃金中場」可謂甩皮甩骨。勢估唔到，僅餘嘅「黃金俠」阿迪達，周三晚頂替菲臘仔，以隊長身份領軍，卻喺開賽後9分鐘，同對手施巴斯坦拿臣一次爭奪中，拉傷右腿肌要退下火線，由史密斯高文入替佢，對「拖肥糖」嚟講，可以講正式宣佈「黃金中場」戰士冇晒。
周三晚唯一嘅「黃金俠」都冇埋，「拖肥糖」想贏都幾難，結果佢哋真係俾「阿伯」嘅包爾斯亞17分鐘先開紀錄，雖然希汀加18分鐘之後幫「拖肥糖」扳平，但最終只能打和「阿伯」。
卡希爾月尾或復出
對於阿迪達嘅傷勢，愛華頓主帥莫耶斯都唔係太過樂觀。「我哋預計阿迪達係拉傷腿肌，當然詳細嘅情況要等進一步檢查先可以定斷，但依我所估計，佢可能要唞幾個禮拜。」
喺上周作客贏紐卡素嘅比賽，「拖肥糖」已經付出咗代價，隊長菲臘仔一樣係拉傷腿肌，預計亦要唞最少一個禮拜。至於「爆炸頭」費蘭尼，有傳話佢季尾可以復出，但亦有指要唞到今年夏天，睇嚟今季都唔使預佢；所以莫耶斯只好冀求攻擊中場卡希爾可以盡快出番嚟，話晒澳洲「黃金俠」係球隊今季嘅首席射手，比起前鋒沙夏同碧福特更加重要，如果依照計劃，佢會係3月尾復出，屆時可謂撐住整條「黃金中場」線。