與台灣男友RickChang感情穩定的朱慧敏（Queenie），雖然與男友分隔兩地聚少離多，不過仍無損感情發展，Rick曾多次向Queenie求婚，但Queenie始終放不下工作，希望事業上有成就才考慮婚事，男友對此表示無限量支持，難怪Queenie忍不住說：「我真係好開心。」
朱慧敏在處境劇《誰家灶頭無煙火》中演教整甜品的導師，她早前更找友人學整甜品，做定功課。問Queenie有否試過為男友下廚？她甜絲絲說：「有，我煲湯好叻，佢飲完都拍手掌。」
讀大學認識
談到男友RickChang，Queenie坦言最初擔心難維繫：「我哋讀大學時認識，可以話識於微時，但嗰陣timing唔啱，隔咗好多年先一齊。最初佢驚我入咗行之後唔知會變成點，反而佢爸爸就叫佢追我，仲話我做唔成張家新抱就做佢契女。」
Queenie續說：「男友對我好好，本來喺美國有份好好嘅工等緊佢，但佢為咗同我拉近距離而放棄咗，留喺台灣發展，但係始終分隔兩地，嗰陣我成日望住個天同媽咪、婆婆傾偈，希望佢哋可以畀啲支持我，冇耐喺夢度見到媽咪，佢用好放心嘅眼神望住我，真係畀咗好多信心，而且我覺得因為大家都有經歷，對呢段情會更認真同珍惜。」
非為釣金龜
其實Rick已多次向Queenie求婚，早前更送上刻有姓氏Chang的求婚戒指給她，但Queenie仍未肯答應：「我都有心動過，但我未捨得放棄工作，公司又畀咗好多機會我，所以我同佢講，入娛樂圈唔係想嫁有錢人，只係鍾意做演員，好想喺事業有成績先諗結婚。佢聽完好尊重我諗法，大家都朝住呢個方向發展，呢段時間咪辛苦啲兩邊飛囉，我唔係想晒命，但我真係好開心。」
撰文：何慧斯 攝影：陳慧安
場地提供：甜姨姨私房甜品
