劉嘉玲同任賢齊兩個fans眼中嘅大明星，日前放下身份，隨隊去到中國西北部偏遠嘅山區探訪，噚日先至返到香港，佢哋每日都行崎嶇不平嘅山路，小齊仲體驗咗村民冒險走到遠遠嘅地方去擔水嘅滋味，佢感覺到真係好危險；嘉玲連日嚟見到村民艱苦生活幾乎日日都喊到開水喉咁，短短幾日足以令嘉玲睇透物質生活嘅虛無，嘉玲心酸咁話：「平時仲會為買唔到個手袋唔開心，呢啲全部都唔係佢哋要諗嘅嘢。」佢仲話日後一有機會必定會同老公梁朝偉一齊再去探訪。
攞獨家金馬獎
鄭秀文同許志安復合，嘉玲噚日接受電子傳媒訪問時以歌詞「有多少愛可以重來」嚟形容呢份喜悅，仲話：「拍爛手掌，呢個愛情故事曲折又浪漫，令人振奮，原來愛可以重新嚟過，希望佢哋快啲有好結果。」小齊亦恭喜安仔同鄭秀文，話呢單新聞係娛圈嘅喜事。
嘉玲主演電影《狄仁傑之通天帝國》入圍競逐金像獎最佳女主角，嘉玲話好多朋友都打算入場支持佢，不過論攞獎機會，嘉玲好謙虛咁話：「我家成熟咗，每次都喺失意中習慣，唔會為獎拍一套戲，最珍貴嘅獎2006年時攞咗，係我生日林青霞同偉仔一齊頒咗隻足金金馬畀我，當時好冧好開心，身邊有好多人錫我。」