香港，絕對係一個地產之都！喺超人蟬聯地球上最有錢嘅華人之同時，原來我哋香港有條街，都蟬聯咗地球上最貴嘅街道！
英國《金融時報》最新嘅調查顯示，香港山頂施勳道再次成為全球最貴嗰條街！而根據堆填區樓市分析員（part-time嗰隻）李華華估計，應該係多次登上全亞洲最貴洋房榜首嘅倚巒帶挈施勳道冧莊嘅！
馬榮成朱立基都係業主
《金融時報》呢個調查，搵嚟國際同各地房地產專家，列出住房均價最高嘅街道，用每平方米價格，得出一個十大最貴街道名單。咁我哋嘅施勳道到底有幾貴呢又？Well，成條街每平方米價值7.82萬美金，大概相當於61萬港紙（以每平方呎計，即係呎價5.7萬港紙），相比前年每平方米價值7萬蚊美金，足足升咗一成二。至於排名第二嘅，就係英國肯辛頓王宮花園；排名第三嘅，就係摩納哥蕾斯公主大街！
講番條施勳道，成條街都係鑽石級豪宅，知名度至高嘅當然係倚巒啦，唔少富豪商賈都係業主，好似漫畫界天王馬榮成，趁金融海嘯低吸其中一間屋，即時被喻為「撈底王」，一度成為城中佳話。另外，越南華僑朱立基、化妝品牌FANCL本港代理商陳志明都係業主，而撇開倚巒，九倉（004）主席吳光正、世茂（813）許榮茂同埋陳振聰胞弟陳振鴻等等都喺呢條街有物業，將呢條街啲業主嘅身家加埋，分分鐘唔輸畀南區嗰邊o架！
李華華
mailto:[email protected]