香港舊年又再成為全球新股上市集資金額最大嘅市場，認真威風，但風光背後，實情係市場參與者未必人人受惠。今個禮拜一，延長交易時段，以為可以做多啲生意，點知，工時長咗唔代表賺多咗。等人幫不如自救，劈價搶客係最直接一招。
舊年年中上市嘅國泰君安（1788）噚日公佈年度業績，當中嚟自首次公開發售新股融資市場嘅業務，竟然比09年下跌咗40.9%，跌至490萬元。集團副主席兼執行總裁閻峰解畫，原因係呢塊肥肉市場競爭劇烈，搞到要降低息差嚟應對，結果肥肉變瘦肉！
證券經紀業務亦唔見得好搵，好似南華同耀才兩間證券行，都話有最低佣金保證，南華話人哋做幾多佢再九折，耀才就畀夠八折㖭。國泰君安舊年冇用到減佣呢招，但都有送iPhone、iPad吸客，結果呢方面佣金收入下跌6.8%至2.91億元。