草蜢成員蘇志威多年來除了活躍於演藝圈，更不忘搞生意。有蘇老闆之稱的他與友人合資開的跳舞學校，越做越有聲勢，最近更開設分校。一直以來他亦有意開班做導師，並表示這個夏天有機會計劃成真。
蘇志威百足咁多爪，投資生意瓣數多。蘇老闆數年前與朋友合資創辦跳舞學校iDance，會員越來越多，本月更會於尖沙嘴開設分店，新校址佔地一萬多呎，成為全港最大跳舞學校，蘇老闆更有意開班親身教學。
只收女徒
早前蘇老闆與跳舞學校的眾導師排舞，並接受訪問，他說：「其實拍檔一直都有呢個提意，只係近幾年真係好忙，今年又要忙巡迴演唱會，仲要做埋《華麗明星賽》主持，我諗最快希望夏天可以開一、兩班，落手落腳自己教。」問會否在學生中找接班人？蘇老闆謂：「我又未到功力搵徒弟，只係想同大家一齊開心跳舞。」
開設跳舞學校，蘇老闆說宗旨是讓學生們可以開心，放工減壓，與草蜢演唱會構思差不多，都是希望觀眾忘我，盡情享受，他笑謂：「其實我哋呢度暫時收女生，等佢哋可以放心跳舞，而且我呢度嘅教師都好靚仔。當然我都英俊瀟灑，大家唔使驚我，可以放心。」同時，為擴充營業，大忙人蘇老闆已計劃在香港區找合適的舖位再開分店。
囡囡好動
另外，談到家中兩個女兒，蘇老闆說她們都很好動，細女更遺傳了他愛跳舞的因子，他說：「遲啲我哋仲會開埋親子班，到時可以帶埋佢哋一齊去上堂。」採訪：王連連
攝影：陳俊強