男人着高跟鞋競跑？聽落睇落都零舍搞笑！坊間有商場為了「3.8國際婦女節」，專登設計出高跟鞋競跑大賽。當然，參加的若只有女性就相當乏味悶死人，但附加男士們穿對不少於2吋的高跟鞋作秒速短跑，真的十（腳）趾痛歸心。
記者︰吳美美
攝影︰梁細權、黃子偉
參賽男士買唔到鞋
來到第二屆的「美麗狂奔．高跟鞋競跑大賽」，在荷里活廣場舉行。上年比賽只分「女子個人組」及「情侶組」，雖已有男士參加，但搞笑度不及一班雄性參加者穿對2吋高跟鞋作短跑狀吸引，所以大會今年增設「男子個人組」，等他們自己單拖上場。不要以為他們只在比賽時才受高跟鞋的氣，其實作賽前買鞋都已甚艱難，試問香港女生又有幾多位會着43號的高跟鞋呢？陰功！難怪見到有男參賽者要剪爛後半截鞋身，再用膠紙加橡筋黐住對腳。然後，於比賽時受「高」與「踭」的苦痛折磨，有參賽者更跑到飛鞋趴地（女子個人組完全無這回事），切合大會想男士們從中體會女士之苦，不要以「愛靚唔愛命」來揶揄女士，皆因佢哋有時受到社會目光所累，所以不得不穿。
賽前訪問了女子組的參賽者，問她們有何心得及準備在幾秒之內跑完25米，部份都說平時有着高跟鞋追巴士經驗。所以由初賽至決賽都由頭帶到尾的女子組冠軍阿詩，就是在日積月累、久經鍛煉的情況下贏得冠軍。聽落好似好笑，但諗落其實替佢每日咁追巴士法辛苦！男士們，你們着平底鞋追巴士又算甚麼?!
情侶組互相鼓勵
大會當中有個活動宗旨寫道——感受「女人唔易做」，從而學懂體諒及包容女生。好可惜，未見男方體諒，先見女方包容！比賽中30對情侶，有部份男伴的高跟鞋都是女伴代購，之前已經講過，39碼都已經難搵，還要搵41、42甚至43的尺碼，真是高難度動作（你有無諗過她們是放工着住高跟鞋去買呢？），有些更搵足八間九間。但小記又不至於一面倒說男人不好，情侶組比賽時，見到有幾對情侶的女參賽者都跑到瞓低，男伴們也即時衝上（或飛上前）扶起或不斷問「有無事呀？你點呀？係唔係好痛？」講真，即時冧晒啦！況且，經過今次比賽，情侶之間都增加了經歷及體驗，好似情侶組冠軍欣欣同Fred，「比賽前我們都有練習過一次，不過不幸地練咗無耐對高跟鞋就爆開，於是我們就一齊修補番。着完高跟鞋之後，覺得做女仔不容易，特別是靚的女人，更加難。」雖然見到對鞋只係用膠紙黏番，手工亦馬馬虎虎，但見兩位小情侶的甜笑，已知他們之間的感情有增無減。
張氏夫婦
「剛剛結婚幾個月，上網見到就來參加。他那對鞋買到最大都唔得，行咗八九間舖都話無，都唔合身，無辦法已經是最大。」
張生&吳小姐
「未試過着高跟鞋跑步，都幾得意！她成日說（着高跟鞋）好痛，所以就想試試跑步感受到底係點。」
楊生&許小姐
「我們拍了拖約八年，計劃結婚。今次純粹貪玩，見幾得意就參加，感覺無乜特別。對鞋好逼好窄，是女朋友幫我買的。」
完全接受男着女鞋
在場所見，男參賽者一到比賽完畢，即刻除都除唔切，以光速脫掉高跟鞋，面上流露尖頭高跟鞋所給予他們痛苦的烙印。但這只限肉身上，因為思想上已經接受咗男人着高跟鞋，好似男子組冠軍黃先生就說：「我覺得時下男人着高跟鞋是OK的，女人着得靚，男人都可以着得靚！我覺得我今日都着得幾靚，哈哈。」
幾年前仲俾人話着高跟鞋妖，或者根本不被大眾受落，想當年走在時代尖端的羅文、張國榮着高跟鞋，好聽講句是前衞，難聽講句就是肉酸、男扮女，「畀我就唔會着出街囉！」但時移世易，這股妖氣已經被時裝洪流冲走，潮人如黃偉文、韓火火、黃宗澤、蔡一傑等明星都已經穿上高跟鞋出入鏡頭前；至於搞笑組代表鄭中基及王祖藍的Handlelababy，將一直以來女性穿高跟鞋的傳統輕鬆帶入大眾眼中，講真，王祖藍又真係着得幾靚「女」嘅。
男子組冠軍：黃先生
「其實之前都有同我的伴侶夾過，我自己是男性，又不是經常穿高跟鞋，但都會去適應着高跟鞋時跑步的感覺，以及兩人手拖手在直路嘗試一起跑，所以今日發揮得好好。我覺得女人着高跟鞋真的會靚啲，好似有時好食的食物都未必健康；同樣道理，高跟鞋可能不是太健康，但就可以展現體態美。」
女子組冠軍：阿詩
「自己平時行很得快，對今次比賽好有幫助。」
情侶組冠軍：欣欣&Fred
「我終於體會到做靚女原來好難。」
我係高踭男！
