【本報訊】新鴻基地產前主席郭炳湘的妻子郭李天穎，前年遭兩名自稱是張子強黨羽的男子串謀勒索案，昨在高等法院續審，庭上播放首被告與假裝郭妻助理的卧底高級督察的對話。首被告透露郭老太鄺肖卿在早年10億元的綁架事件中，承諾「連棺材本都攞埋出嚟」，成功說服綁匪張子強先收6億元贖金。張子強1998年在內地被處決，首被告稱是「死鬼老大臨死前吩咐」追收4億元尾數。
有組織罪案及三合會調查科（俗稱O記）高級督察吳宇凡，在09年11月24日奉命扮作郭李天穎的私人助理，與被指提出勒索的首被告陳威行（58歲）聯絡。吳12月2日致電勒索信內寫下的手機號碼，但未能接通，他傳短訊給對方，留下一個固網電話號碼，終在12月4日收到首被告來電。
指郭老太當年拿出棺材本
吳向陳威行自稱是郭妻的私人助理PaulWong，表示希望低調處理事件。對於勒索信中要求郭李天穎「履行承諾」，陳解釋是郭炳湘在十多年前被綁架勒索10億元事件中，郭老太鄺肖卿承諾先付6億元換取「盡快畀個大仔（郭炳湘）出嚟先」，4億元會分期付款。張子強後來在內地被處決，事件不了了之，故他們現要求取回尾數，不會多收分毫。對於吳說4億元是個大數目，陳反駁稱：「我哋損失仲大，我哋損失五條命呀。」
陳威行提醒吳應與郭老太，而非「細郭太」（郭李天穎）商量，「大郭太揸主意，呢件事喺嗰陣時，佢話連棺材本都攞埋出嚟，用家族名義同我哋傾偈嘅」、「係大郭太應承畀十個（億元）我哋嘅」。陳以性命及人格保證是最後一次勒索，雙方「講個信字」，收了錢後「就雞飛狗走o架喇，永遠離開香港，我哋唔會再搞乜嘢」，還說假若郭家將來遇到「古靈精怪」的事，他們可以幫手。
警告勿拖延 否則做大戲
12月16日，吳致電回覆陳，表示郭李天穎擔心勒索事件會沒完沒了，要求陳交代清楚勒索人身份及人數。陳說他是奉命行事，「係我哋個死鬼老大臨死前吩咐一定要收呢筆數」、「我就係一個代表，我可以全權話事」，着吳不用理會有多少人分贓。陳警告吳不要拖延時間，否則他們會向「另一個老細」做場大戲，以殺雞儆猴。陳更一度懷疑吳是警務處前副處長黃燦光。陳再次承諾今次是最後一次勒索，還建議吳可找特首曾蔭權、時任警務處處長鄧竟成做見證人。陳最後要求吳先付8,000萬元，以表誠意。
吳宇凡昨日接受盤問時指出，按與他通電話人士的聲音、發音，以及兩次對話的連貫內容，確定兩次通話都是同一個人。聆訊今續。
案件編號：
HCCC239/10
卧底警與匪徒對話節錄
陳：陳威行（首被告）
吳：吳宇凡（卧底高級督察）
陳：你問嗰個郭太係大郭太定細郭太？
吳：細郭太。
陳：細郭太？你最好同大郭太講，大郭太揸主意，呢件事喺嗰陣時，佢話連棺材本都攞埋出嚟，用家族名義同我哋傾偈嘅……係大郭太應承畀十個（億元）我哋嘅。
吳：如果我話畀佢（郭炳湘）聽張生、張生，佢會唔會唔記得邊個？我諗佢未必記得邊個！
陳：你問佢，佢當初臨走嗰陣時同我約定有個英文字母嘅，就係最後一個英文字母阿Z，你問佢記唔記得呢件事，同埋佢食乜藥，佢胃痛食乜藥，我半夜三更都買藥畀佢食，呢啲冇錯o架喇……最尾嗰個英文字母就係咁簡單，以後邊個嚟都係用嗰個嚟做見證，最後個英文字母，就係你阿郭生，同我哋交低。
陳：拖拖拖，冇得拖！
吳：唔係有心拖你呀！
陳：我同你講、同你講。我哋仲有另一個老細o架，你應該好明白o架！你哋唔畀唔緊要o架，我哋仲有一個老細畀o架，到時我做場大戲畀佢睇o架，嗰時你哋，殺雞儆猴個故事，你知唔知呀？
資料來源：庭上播放對話