對於微軟創辦人蓋茨（BillGates）嚟講，做「大慈善家」明顯比做「大富翁」吸引！點解華華咁講，因為佢為咗做慈善家，甘願放棄全球首富呢個銜頭。
財經雜誌《福布斯》將會喺今日公佈一年一度全球億萬富翁排名，財富研究機構Wealth-X就估計，由於蓋茨已經捐咗三分一身家，今年應該唔會成為全球首富，但仍然會同股神畢菲特、墨西哥電訊大亨斯利姆（CarlosSlim），繼續並列頭三甲位置。
難成《福布斯》富豪榜首名
間機構嘅總監林肯話，蓋茨、畢菲特同斯利姆現時嘅身家，應該分別有490億、600億同470億美金。佢仲話如果蓋茨無成立慈善基金嘅話，財產應該有成880億美金，難以動搖佢首富之位。
蓋茨06年成立Bill&MelindaGatesFoundation，專注喺全球醫療發展同美國教育，蓋茨同佢嘅太座咁耐以嚟，已經捐咗280億美金到基金中，令基金成為全美最大嘅慈善基金。至於佢老友畢菲特，亦捐咗80億美金。
不過，唔知蓋茨係唔係太醉心搞慈善，佢隻微軟股價近年表現認真麻麻，個市升到「嘭嘭聲」，反而微軟09年尾到家逆市跌成16%。反觀股神投資旗艦巴郡，股價升逾29%，仲喺上周創埋每股13.13萬美元嘅歷史新高。睇嚟蓋茨要努力啲，唔好令慈善基金太縮水，先至可以令多啲人受惠。
李華華
mailto:[email protected]