寶馬Isetta　走進小人國

老爺車總令人想起散發豪華古典味的豪華房車，不過今日的老爺車卻走Cutie路線，有人形容他是雞蛋車或BubbleCar，但我覺得它像花師奶，雞蛋面形配上雞蛋車形，簡直是絕配！不得不承認這輛車雖經歷超過半世紀，但絕無受歲月摧殘，保持可愛，見到它令你想笑。

記者：趙慧敏
攝影：梁細權
Model：Rika@GMEModels
車輛提供：JPGMotor（27933389）

靠三輪車響朵

相信唔會太多人知道這輛Isetta是寶馬產物，極其量只知寶馬是靠製造飛機引擎起家，所以寶馬標誌亦取自藍天白雲再配螺旋槳，然後進軍豪華房車市場。不過咪以為大雞唔食細米，寶馬出產的Isetta，在五十年代靠這輛小車叱咤一時！原來二次大戰後德國陷入經濟低潮，豪華房車乏人問津，寶馬於是向平價汽車市場埋手，用三輪機動車引擎，與一間雪櫃製造工廠合作生產Isetta，當年曾出產四輪及三輪款式，不過仍以價平易出牌的三輪版較受歡迎。

■上世紀Isetta出鏡率甚高，現今不少照片都見其蹤影。

只此一款型號

這輛Isetta雖打着寶馬旗號，不過生產線卻在英國，當年在英國較在德國更受歡迎，車主為要將Isetta據為己有，在英國較易覓得心頭好，以這輛產自1957年的三輪老爺車來說，近二十萬元的車價，價錢算是硬淨。不過一分錢一分貨，單是物以罕為貴便成為升格的原因，Isetta投產期僅由1955年至1962年，只此一款型號，至今仍保存完好的相信不多。
除了身價，獨特設計亦是受歡迎的原因，三輪設計只有兩個座位，車門設於車頭，開門時連軚環一併拉起，咁過癮當然第一時間鑽入車廂，由於車頂空間頗大，沒有侷促感，當握着大大的軚環、望着前面的擋風玻璃、車側的雞翼窗，一切都變成迷你版，覺得自己進入了小人國，有時又覺自己走進一架玩具車，充滿趣味，我與攝影師等人都將Isetta視作玩具般，在車廂進進出出不停試玩。

上公路咪預佢

以為可以揸住它外出兜兜風，偏偏Isetta唔聽話，沒有電源，惟有在車房的大門前拍攝，將車推到門口，已引來一些人圍觀，不斷猜測其車款及型號，可以想像揸佢出街時的招搖程度。
不過要上公路就咪預佢，事關只有300毫升汽缸，雖然原廠講明最高時速達85km/h，不過要錫住這輛老爺車，無人會敢試其極速。但車主拍心口話車身內外及引擎都經過大翻新，部份配件還在英國訂購回來，所以性能絕對有保證，平日亦會租予新人作花車，行遠啲都無問題，不過最後車主都補充說：「全車只重350kg，就算唔好彩跪低，都好容易將佢搬走。」
據聞寶馬稍後會推出以Isetta為名的全新版，並走節能小車市場，如屬實的話，以Isetta的可愛車形又會掀起話題。