美國被「解放」了！郁佢嘅仲係一向被嘲笑嘅北韓？正改朝換代嘅北韓，非但無積弱下去，2027年更打到去美國本土，呢個就係《HomeFront》嘅開場白，大膽幻想，故事情節合情合理，今日正式開戰！
記者：許福合
2027打到美國
HomeFront之前喺E3展出時，已經好受關注！事關背景設計敏感，而且正值北韓領導人換班、金正恩上場，自然有想像空間。話說在2013年，北韓閃電進佔南韓，甚至東南亞（從地圖睇，香港都好似要淪陷），成立大韓聯邦，國力發展迅速，並在2027年利用衞星攻擊美國本土，隨後韓軍更佔領大半個美國！正如荷李活電影橋段，美國當然不會這樣玩完，玩家在遊戲內會成為Rambo，發動游擊戰，保家衞國！
場景真實
睇完一開場介紹劇情背景嘅CG，就會見到一幕韓軍當街逮捕、押解民眾，有人想逃跑，立即會被槍殺，血腥非常！韓軍軍備非常先進，有自動射擊機炮嘅監視塔，遇到都要避開。遊戲以第一人視點進行，畫面有接近實景嘅光影效果，睇住四周戰場一樣嘅社區，上面反抗嘅字句，可以體驗到淪陷區慘況。
32人網戰
玩家主要飾演自由鬥士，簡單講即係游擊隊。遊戲開初只有幾件簡單裝備，擊殺敵軍時可執到武器，而隨着遊戲進行，開始要面對北韓重型武器，玩家亦有機會駕駛戰機、戰車作攻擊。另外，網上對戰係重頭戲，會有唔少新道具，如飛行道具，可遙控攻擊，亦有各類戰車裝備，而且會有網戰專用地圖，例如XB360就公佈咗會有張Suburb地區，最高可以供32位玩家連線對戰。
Profile
主機：PS3/XB360/PC
廠商：THQ
類型：射擊
發售日期：3月8日
遊戲人數：1-32人
官方網站： http://www.homefront-game.com/
