香港大學慶祝一百周年，會搞好多學術講座，請好幾位重量級諾貝爾獎得獎人來港，應該好有睇頭。但第一炮係邊位，左丁山唔知，在三月四日就請咗一位名人/名作家JohnNaisbitt（約翰．奈斯比特），講「2020年全球趨勢分析」，港大人及嘉賓熱烈捧場，聞說有過千人到場，場面比索羅斯與李光耀到港大演講熱烈得多。呢位八十二歲老人係暢銷書作家，生平賣書超過一千萬本，吸引力係好夠嘅，至於與學術有無關係，唔諗得咁多咯。
大公關事前叫左丁山一齊去聽，但左丁山素來不學無術，鍾意美食更加多啲，晚上唔得閒，因為要到跑馬地滿貫廳吃海南菜。第二日，打電話搵賓架Ｗ，問佢在陸佑堂聽成點，佢話聽聽吓就拎個黑莓出嚟睇電郵與覆電郵，講晒咯。哦，既然係咁，唔去聽都冇乜損失，睇一啲報紙報導，奈斯比特所言，卑之無甚高論，仲要俾評論員顧汝德LeoGoodstadt窒佢㖭。《經濟日報》老闆馮紹波亦係座上評論員，《經濟日報》如此報導：「趨勢大師約翰．奈斯比特昨以亞洲的教育及創新為題演講，未能回答不少提問，有些答案的理據不足……」「台下部份觀眾向他詢問本港學制及中港關係問題，他的答案卻流於空泛，令人懷疑他是否事前準備不足。」
奈斯比特呢類「講師」，到商會午餐例會演講做騷就最啱，到大學演講就會與期望有啲落差咯。賓架Ｗ話窒親奈斯比特嗰位顧汝德就辭鋒犀利，講番以前睇趨勢，就提到：「中文大學成立時，有人感到憂慮，驚住中大會對港大構成威脅，butIdonotneedtoelaboratefurther。」台下港大人即時大笑。中文大學有人識得英文嘅啩，佢地應該明白港大人點解笑。
好彩左丁山在滿貫廳食文昌雞食得好開心，海南三亞市天域度假酒店有四位名廚來滿貫廳獻藝，自三月三日至十三日提供正宗海南菜，全部食材來自海南，例如一味「瓊島小黃牛」就來自五指山，連牛皮一起烹煮，嘩，原來牛皮可以咁好食嘅，以前未試過。滿貫廳不限馬會會員，公眾亦可入內飲茶食飯，為咗咁多美妙正宗海南菜，行入跑馬地幾值得啫。