呢排因為「茉莉花革命」，搞到茉莉花一支難求。八方報道過，有讀者想訂啲茉莉花苗喺花園種，都疑被內地海關沒收；加上花期未到，市面根本好難搵到茉莉花。不過，「阿牛」曾健成最近一連幾次去中聯辦、政府總部等地種花，究竟佢啲花點搵番來？
先見之明一早買花苗
八方問過阿牛，佢先旨聲明，話佢採用嘅茉莉花枝全部係真嘢，絕對唔係A貨，亦唔係好似其他人咁求其搵啲白色花當係。原來，佢好有先見之明，早喺突尼斯爆發茉莉花革命時，已經去旺角花墟，用成二千蚊訂購50盆茉莉花苗，擺喺屋企天棚度種。
3、4月先係茉莉花期，所以仲未開花。不過呢排成日拎啲枝葉去示威，加上剪咗唔少出嚟，喺上月維園華叔追思會上畀市民獻花，所以阿牛家只係剩番幾盆，惟有慳住用。例如上星期喺中聯辦外成功種落個政治花槽嗰幾棵，被警方拔起後，阿牛佢哋攞番，又拎去西區警署想話再種，前晚趁反預算案遊行，再拎嗰幾棵去政府總部種，循環再用，好鬼環保。
毫無園藝經驗嘅阿牛儼如成為茉莉花王，話正向花農學緊點樣插枝繁殖，因為佢哋計劃嚟緊每個星期日，都拎茉莉花去「散步」。八方問阿牛諗住拎去邊，佢話諗緊送幾棵畀駐港解放軍，「代表軍人應該保衞人民，阻止獨裁者殘害人民。」八方問佢種茉莉花有乜心得，佢煞有介事咁話：「茉莉花嘅特性係會令啲獨裁者好頭痕，除咗中東、北非嗰啲國家，你睇北京成日洗街又出動咁多公安，反映佢哋好驚茉莉花。」
外國一直有游擊園藝
查實外國一直有人玩「游擊園藝」（guerrillagardening），喺啲公共空間或者冇人理嘅私人地方，例如地盤、爛地、路邊花槽種嘢。73年紐約有班人就喺塊荒廢嘅私人地上種花，種到後來連政府部門都認可埋；2000年倫敦就有數以千計嘅游擊園藝家，喺國會廣場種花種菜。呢類行動有抗議公共空間不足、街頭屬於人民嘅意味，有個游擊園藝網站嘅口號係「用泥耙同花兒對抗邋遢（filth）」，filth呢個字，有時用嚟鬧警察。
mailto:[email protected]
