效力曼聯嘅葡萄牙國腳翼鋒拿尼，貴為英超頂級球星，但居然同好多香港小市民一樣，都係「N無人士」。不過，佢唔係冇公屋、冇綜援、冇物業、冇稅交同冇MPF戶口，而係冇親情、冇友誼、冇健康同冇人撐，幾乎要唱崔健嘅名曲《一無所有》。
現年24歲嘅拿尼，喺禮拜日曼聯作客輸畀利物浦1:3嗰場英超「雙紅會」中，先係喺禁區頭槌「二傳」畀古積特頂入成2:0，之後仲被紅軍後衞加歷查踢傷，被迫喺完半場前退下火線，真係黑到爆。咁到未算，日前佢仲俾英國小報踢爆同阿哥因財失義。
拖阿哥糧對簿公堂
話說拿尼有個原本做地產嘅33歲哥哥荷西艾美達，放棄自己份工嚟幫佢手，仲同佢簽咗份15萬鎊嘅合約，點知拿尼原來係無良僱主，冇出糧畀荷西艾美達，搞到對方因斷供而冇咗間65萬鎊嘅屋。
家陣喺荷蘭做足球經紀嘅荷西艾美達，於是同拿尼對簿公堂，要求細佬賠償100萬鎊。荷西艾美達嘅朋友話：「荷西為咗拿尼放棄晒所有嘢。初頭拿尼都有出糧，但之後開始走數，荷西都冇諗到自己嘅親細佬居然會咁對佢。佢別無選擇，惟有用法律嚟解決兄弟之間嘅問題。」
拒加歷查道歉等費Sir撐
除咗冇親情，拿尼喺「雙紅會」俾加歷查劏開咗小腿上下五吋啲肉，事後證實最多要唞1個月，估計喺4月初，聯賽作客對韋斯咸先至復出。整傷佢嘅加歷查其實事後都有道歉，不過仍怒火中燒嘅拿尼話明唔會接受，換言之，即係冇埋友誼。
拿尼經已冇親情、冇健康同冇友誼，而喺呢次受傷事件上，球會亦冇人撐佢，真係慘上加慘。小道消息話，拿尼對於佢受傷之後，冇紅魔職球員公開批評加歷查嗰吓攔截，感到非常失望。不過，曼聯領隊費格遜早前因批評球證艾堅遜而俾英足總告行為不檢，家吓佢力撐到底唔認罪，所以有指曼聯為免節外生枝，於是落柯打叫啲職球員封嘴。以老費嘅性格，相信佢喺自己單嘢完咗之後，會幫拿尼攞番個公道，所以拿尼唔係冇人撐，只不過係要畀啲耐性等吓啫！